3 საათის განმავლობაში პასუხობდა გამომძიებლების კითხვებს მოდულის შენობაში მისული „ერთიანი ნაციონალური მოძრაობის“ წევრი, ლევან ხაბეიშვილი.
როგორც გამოკითხვიდან გამოსულმა ხაბეიშვილმა „ჯი-ეიჩ-ენს“ განუცხადა, მან საგამოძიებო უწყებას დეტალურად მიაწოდა კონკრეტული მაჟორიტარ-დეპუტატების მხრიდან კანონის დარღვევის შესახებ მის ხელთ არსებული ინფორმაცია.
„მაჟორიტარ-დეპუტატების ბიოუროებში არსებულ სავარაუდო კორუფციაზე და ნეპოტიზმზე სისხლის სამართლის საქმეა აღძრული. ყველაფერი იმდენად ზედაპირზეა, წარმოუდგენელი გახდა, ამაზე საქმე არ აღეძრათ. ყველა კითხვაზე პასუხი ამომწურავად გავეცი და მათ ყველა სახის ინფორმაცია, რაც მქონდა, მივაწოდე. საუბარია, რამდენიმე მაჟორიტარის მხრიდან კანონის დარღვევაზე. ესენი არიან, ვარკეთილის მაჟორიტარ-დეპუტატი ია მაქაცარაშვილი, ასევე, მე-3 მასივის მაჟორიტარ-დეპუტატი, ლევან დარახველიძე და ვაკის მაჟორიტარ-დეპუტატი გიორგი მუსხელიშვილი.
მიუხედავად იმისა, რომ პოლიტიკურ ინსტრუმენტად ქცეული საგამოძიებო უწყებების არ მჯერა, იქ მაინც მივედი და დეტალური ინფორმაცია მივაწოდე. იმედი მაქვს, რომ დღეს თუ არა, ახალი ხელისუფლების პრიობებში მაინც, ყველა, ვინც ბიუჯეტიდან თანხებს იპარავს, აუცილებლად პასუხისგებაში მიეცემა. ამ საქმეს ან ბოლომდე მიიყვანენ, ან პოლიტიკურ გადაწყვეტილებას მიიღებენ და თაროზე შემოდებენ. ვერ გეტყვით, რომ ამათი გამჭირვალე გამოძიების იმედი მაქვს. თუმცა, არაფერს გამოვრიცხავ, დაველოდოთ მოვლენების განვითარებას“, - განუცხადა ,,ჯი-ეიჩ-ენს'' ლევან ხაბეიშვილმა.
