„სარჩელის პირველ შეტანაზე მოსამართლემ ე.წ. ხარვეზი დაადგინა, რომელიც აღმოიფხვრა. სარჩელი თავიდან, 20 ოქტომბერს შევიტანე და დღედღეზე ველოდები, განჩინებას წარმოებაში მიიღებენ თუ არა“, - განუცხადა „ჯი-ეიჩ-ენს“ დეკანოზ გიორგი მამალაძის ადვოკატმა, მიხეილ რამიშვილმა.
როგორც ადვოკატი აცხადებს, პირველ ჯერზე მოსამართლემ სარჩელის ფორმულირება ვერ გაიგო.
„როგორი ფორმით უნდა ყოფილიყო ტექსტის, „ჩანერგილი აგენტის“ უარყოფა, ამის ფორმულირებას ვერ იგებდნენ. დეტალურად მივწერე, რომ სადაც ითქვა და საიდანაც ეს ცრუ ინფორმაცია, ცილისწამება გავრცელდა, იქ უნდა ათქმევინონ უსახელოს, რომ ეს ცილისწამება იყო“, - აცხადებს რამიშვილი.
ადვოკატი იმედს გამოთქვამს, რომ მოსამართლე აღნიშნულ სარჩელს წარმოებაში მიიღებს.
„ ვიმედოვნებ, რომ მოსამართლეს გონიერება ექნება და ამ სარჩელს მიიღებს. თუ არადა, რა შეცდომა და ხარვეზიც არ უნდა დამიდგინოს, იმასაც გამოვუსწორებ. თუ მოსამართლეს ახალი კანონის მიღება უნდა და ახალი ნორმები სჭირდება, ეს უკვე აღარ ვიცი“, - აცხადებს მიხეილ რამიშვილი.
შეგახსენებთ, მეუფე იაკობმა ერთ-ერთი ტელეკომპანიის ეთერში მიხეილ რამიშვილს სანდრო გირგვლიანისა და დეკანოზ გიორგი მამალაძის საქმეში ჩანერგილი აგენტი უწოდა. რამიშვილი თვლის, რომ ამით სასულიერო პირმა მისი პატივი და ღირსება ხელჰყო, რის გამოც, 2 ოქტომბერს მის წინააღმდეგ თბილისის საქალაქო სასამართლოში სარჩელი შეიტანა. უფლებადამცველი მეუფისგან საჯარო ბოდიშის მოხდასა და ფულად კომპენსაციას მოითხოვს.