ახალი საკონსტიტუციო ცვლილებები, რომელიც ე.წ. ბონუსს სისტემას აუქმებს და ბლოკების დაშვებას უზრუნველყოფს, პატარა პარტიების განვითარებას შეუწყობს ხელს,- ამის შესახებ პარლამენტის ვიცე-სპიკერმა გია ვოლსკიმ განაცხადა. მისივე თქმთ, სასიამოვნო არ არის, როცა საკონსტიტუციო პროცესში ოპოზიცია არ არის ჩართული.
,,კონსტიტუცია ჩამოყალიბებული დოკუმენტია, რომელიც სახელისუფლებო შტოებს შორის ძალაუფლების ბალანსს და ქვეყნის სტაბილურ განვითარებას უზრუნველყოფს. ყველაფერი დამოკიდებულია იმაზე, რამდენად პასუხისმგებლიანი იქნება ოპოზიციისა და თუნდაც პრეზიდენტის დამოკიდებულება. ეს ხუთი პარტიის მიერ შემუშავებული დოკუმენტია და დიდი ბჭობის შემდეგ გადავწყვიტეთ, რომ ეს ოთხი საკითხი წინ წამოვწიოთ, რაც პატარა პარტიების გაძლიერებას ხელს შეუწყობს. თუ შერეულ სისტემას 2020 წლისთვის ვტოვებთ, ეს იმ იმედით ხდება, რომ ახალი თაობის პარტიები ქვეყნის მართვაში 2024 წელს კონსენსუსის მიღწევას შეძლებენ. 2020 წლისთვის ამის რეალური რესურსი არ გაგვაჩნია და ქვეყანას პოლიტიკური კრიზისის წინაშე დავაყენებთ", - განაცხადა ვოლსკიმ.
პარლამენტის თავმჯდომარის ირაკლი კობახიძის განცხადებით, ახალი საკონსტიტუციო ცვლილებების ინიცირება დღეს ან ხვალ მოხდება. ირაკლი კობახიძის ინფორმაციით, ხელმოწერების შეგროვება დასრულებულია და ხუთშაბათს საყოველთაო-სახალო განხილვის კომისია შეიქმნება. ამასთან, პარლამენტის თავმჯდომარემ ხაზი გაუსვა, რომ კონსტიტუციის შინაარსთან დაკავშირებით დისკუსიები დასრულებულია და ცვლილებები მხოლოდ ვენეციის კომისიასთან შეთანხმებულ ოთხ საკითხს შეეხება.