"საეჭვოა ის ფაქტი, რომ ნუცუბიძეზე მომხდარ ინციდენტში მონაწილე პოლიციელებს კამერა ჩართული არ ჰქონდათ", - ამის შესახებ საქართველოს ახალგაზრდა იურისტთა ასოციაციის იურისტმა ლევან ვეფხვაძემ ნუცუბიძის ფერდობზე მომხდარ ინციდენტთან დაკავშირებით განაცხადა.
მისივე განმარტებით, პოლიციის შესახებ კანონით და მინისტრის ბრძანებით ნათლად არის განსაზღვრული, რომ პოლიციელი მოქალაქესთან ურთიერთობის დროს ვალდებულია ჩართოს სამხრე კამერა.
„პოლიციის შესახებ კანონით და მინისტრის ბრძანებით ნათლადაა განსაზღვრული რომ პოლიციელი მოქალაქესთან ურთიერთობის დროს ვალდებულია, მით უფრო როდესაც ადმინისტრაციული დაკავება ხდება, ჩართოს სამხრე კამერა.
მეორე საკითხია, რატომ არ იყო სამხრე კამერა ჩართული და ეს გამოძიების დასადგენია.
ის, რომ კამერა არ იყო ჩართული უკვე ძალიან ბევრ ეჭვს აჩენს აღნიშნულ საკითხზე.
ამიტომ, ჩვენ ხვალ მივმართავთ პროკურატურას, ოჯახთან შეთანხმებით, დაზარალებულის უფლებამონაცვლედ ცნობის თაობაზე რაც გვჭირდება საქმის მასალების გასაცნობად.
ამის შემდეგ შევძლებთ გავარკვიოთ რა საგამოძიებო მოქმედებები აქვს ჩატარებული პროკურატურას და არის თუ არა კანონშესაბამისი ჩატარებული საგამოძიებო მოქმედებები.
სამხრე კამერა რომ არ იყო ჩართული, ეს არის კანონმდებლობის დარღვევა და აჩენს ბევრ კითხვებს, რასაც სახელმწიფომ უნდა გასცეს დასაბუთებული პასუხი",- განაცხადა ლევან ვეფხვაძემ.
ცნობისთვის, დღეს აღნიშნულ ფაქტთან დაკავშირებით, საქართველოს მთავარმა პროკურატურამ განცხადება გამოაქვეყნა.
უწყების ინფორმაციით, ერთ-ერთი პატრულ-ინსპექტორის სამხრე კამერას დაფიქსირებული არ აქვს მომხდარი ინციდენტი და დაკავების პროცესი.