ე.წ. ციანიდის საქმის მოსამართლის, ბესიკ ბუგიანიშვილის განცხადებას, რომელშიც ის გაკვირვებას გამოთქვამს, თუ რატომ არ მისცა პროკურატურას დაცვის მხარემ ჩვენება, „ჯი-ეიჩ-ენთან“ ადვოკატი გიორგი ფანცულაია ეხმაურება.
„ბესიკ ბუგიანიშვილის ეს კომენტარი არ მიკვირს, რადგან პროკურატურასა და ბესიკ ბუგიანიშვილს შორის სხვაობას ვერ ვხედავ. ბუგიანიშვილი იმ ხმაში მღერის, რომელ ხმაშიც პროკურატურა. თუ რატომ საუბრობს ის პროკურატურასთან ერთ ხმაში, ეს დეკანოზის განაჩენიდანაც ჩანს და ბევრი ახსნა არ სჭირდება“, - განაცხადა გიორგი ფანცუალაიამ.
ბესიკ ბუგიანიშვილი თავის განცხადებაში აღნიშნავს, რომ ის ვერ ხსნის ე.წ. ციანიდის ადვოკატების განმარტებას, რომ ისინი საკუთარი თავის წინააღმდეგ ჩვენებას არ მისცემდნენ. აღნიშნულთან დაკავშირებით უფლებადამცველი ფანცულაია მოსამართლეს პასუხობს.
„გაასაჯარონ ჩემი საუბარი, რომელშიც 50-ე მუხლზე ვსაუბრობ, რომ როგორც ადვოკატს, მაქვს უფლება და ვალდებულება ჩემ საადვოკატო საქმიანობასთან დაკავშირებულ საკითხებზე ჩვენება არ მივცე. ეს მუხლიც რომ არ მიცავდეს, 49-ე მუხლი მიცავს და უფლებას მაძლევს, არ მივცე ჩვენება საკუთარი თავის ან ახლო ნათესავის წინააღმდეგ“, - განაცხადა ფანცულაიამ.
შეგახსენებთ, რომ მთავარმა პროკურატურამ ე.წ. ციანიდის საქმის მოწმეების ჩვენებების მედიასაშუალებებში გავრცელების ფაქტზე გამოძიება 3 ოქტომბერს დაიწყო. აღნიშნულ საქმესთან დაკავშირებით, დღეს თბილისის პროკურატურაში გამოკითხვაზე იმყოფებოდა მოსამართლე ბესიკ ბუგიანიშვილი.