"მთავრობა და ეროვნული ბანკი იმეორებს შარშანდელ შეცდომებს", - ამის შესახებ ენმ-ის წევრი, რომან გოცირიძე ლარის კურსის გაუფასურებასთან დაკავშირებით, Facebook-ის საკუთარ გვერდზე წერს.
გოცირიძის აზრით, ჯერ კიდევ არის გამოსავალი და ამას ჭკუა და პოლიტიკური ნება სჭირდება.
"მაშინ, როცა სხვადასხა მიზეზის გამო ( ძირითადად, ხელისუფლების ფისკალური და მონეტარული ქცევით გამოწვეული) არსებობდა ლარის გაუფასურების რისკები, მთავრობამ კვლავ გადადგა უპასუხისმგებლო ნაბიჯი. გუშინ კვლავ გაასესხა ხაზინის ფული 50 მილიონი ლარის ოდენობით კომერციულ ბანკებზე. დღეისათვის მთავრობის მიერ ბანკებზე გაცემული სესხები 635 მილიონი ლარია, მათ შორის 450 მილიონი ლარი-ბოლო ოთხი თვის განმავლობაში. ასევე მნიშვნელოვნად არის გაზრდილი ეროვნული ბანკის რეფინანსირების სესხები შარშანდელ ანალოგიურ პერიოდთან შედარებით და მან 1,7 მილიარდ ლარს მიაღწია( 1,145 მილიარდი ლარი 2016 წლის ოქტომბრის ბოლოს).
მთავრობისთვის და ეროვნული ბანკისთვის ცნობილი იყო, რომ ბიუჯეტის ხარჯები გეგმისგან აცდენილი იყო დაახლოებით 400 მილიონი ლარით და წლის ბოლომდე საჭირო იქნებოდა მისი "გაწოვა" ბოლო კვარტალში ტრადიციულად დიდ ხარჯებთან ერთად.
მთავრობა და ეროვნული ბანკი იმეორებს შარშანდელ შეცდომებს, მიუხედავად არაერთი გაფრთხილებისა.
ჯერ კიდევ არის გამოსავალი. ამას ჭკუა სჭირდება და პოლიტიკური ნება", - წერს რომან გოცირიძე.
