უკრაინელ დეპუტატზე თავდასხმაში რამზან კადიროვის დადანაშაულებას ოფიციალური მოსკოვის მხრიდან მწვავე რეაქცია მოჰყვა. საგანგებო განცხადება კრემლის პრეს-მდივანმა დიმიტრი პესკოვმა გააკეთა.
„ეს არის აბსოლუტურად უსაფუძვლო, ისტერიული ბრალდებები არამხოლოდ რამზან კადიროვის, არამედ მოსკოვში მომუშავე ყველა თანამდებობის პირის მიმართ. ეს კიევსა და უკრაინაში არსებული რუსოფობიის კიდევ ერთი გამოვლინებაა“, - აღნიშნა პესკოვმა.
დეპუტატ იგორ მოსიიჩუკზე თავდასხმა კიევის ცენტრში გვიან საღამოს განხორციელდა, რასაც 2 ადამიანი ემსხვერპლა, 4 კი დაშავდა. აფეთქების შედეგად სხეულის მძიმე დაზიანებები მიიღო მოსიიჩუკმა.
მოგვიანებით უკრაინის შინაგან საქმეთა მინისტრის მრჩევლმა ივან ვარჩენკომ განაცხადა, რომ დეპუტატის მკვლელობით ჩეჩნეთის ლიდერი რამზან კადიროვი იყო დაინტერესებული.
