ახალგაზრდა იურისტთა ასოციაციის ხელმძღვანელ ანა ნაცვლიშვილის განცხადებით, დაკავებისას გარდაცვლილი პირის საქმეზე სამართალდამცავმა ორგანოებმა უნდა შეისწავლონ, არსებობდა თუ არა ამ პირის დაკავების საფუძველი, როდესაც შეუძლოდ გახდა, რა რეაგირება მოახდინეს სამართალდამცველებმა, მათ შორის - გამოიძახეს თუ არა სასწრაფო დახმარება.
როგორც ანა ნაცვლიშვილი აღნიშნავს, მიუხედავად იმისა, აქვს თუ არა ოჯახს პრეტენზია, ადამიანი გარდაიცვალა პოლიციელის ხელში და შესაბამისად, გამოძიება უნდა ჩატარდეს.
„კარგია, რომ საქმეს იძიებს პროკურატურა, რადგან შესაძლოა, შინაგან საქმეთა სამინისტროს თანამშრომლების კანონთან შეუსაბამო მოქმედებას ეხებოდეს საქმე. ასევე, მნიშვნელოვანია, სწორი კვალიფიკაციით მოხდეს საქმის წარმართვა. ამ ეტაპზე კვალიფიკაცია, რომელიც საქმეს აქვს მინიჭებული, მაინცდამაინც არ ისახავს მიზნად, შეაფასოს პოლიციელების მოქმედებების კეთილსინდისიერება. კვალიფიკაციის ნაწილში გასაფართოებელია ხედვა, რადგან შესაძლოა, საქმე ჰქონდეს სამოხელეო უფლებამოსილების გადამეტებას ან არაჯეროვან მოქმედებებს მას შემდეგ, რაც მოქალაქემ უთხრა პოლიციელებს, რომ თავს არ გრძნობდა კარგად. მნიშვნელობა არა აქვს სახელმწიფოსთვის, გარდაცვლილის ოჯახს გააჩნია თუ არა რაიმე პრეტენზია. ადამიანი გარდაიცვალა პოლიციელთა ხელში და შესაბამისად გამოძიება უნდა ჩატარდეს“, - აცხადებს ორგანიზაციის ხელმძღვანელი ანა ნაცვლიშვილი.
