„ადამიანის მდგომარეობა, რომელიც ციხეში უდანაშაულოდ ზის და სასჯელს იხდის, შეუძლებელია კარგი იყოს. მისი არც ფიზიკური მდგომარეობაა სახარბიელო და არც ფსიქიკური“, - განუცხადა „ჯი-ეიჩ-ენს“ ე.წ. მატროსოვის ციხიდან გამოსვლის შემდეგ დეკანოზ გიორგი მამალაძის ადვოკატმა, პაატა მეხრიშვილმა.
როგორც ადვოკატი აცხადებს, მსჯავრდებულ სასულიერო პირთან უფლებადამცველებმა სამართლებრივ დეტალებზე და ბრძოლის გეგმებზე გაიარეს კონსულტაცია. თუმცა, მათი საუბარი გუშინ დეკანოზთან მეუფე დიმიტრი შიოლაშვილის ვიზიტსაც შეეხო.
„სამართლებრივ დეტალებზე შევაჯერეთ პოზიციები. ბუნებრივია, მასთან მეუფე დიმიტრის შეხვედრაზეც ვისაუბრეთ. დეკანოზი კმაყოფილია იმით, რომ მეუფის კითხვებს სრულყოფილი პასუხები გასცა. მამა გიორგი ფიქრობს, რომ ეს შეხვედრა მეუფესაც და საპატრიარქოსაც ამ საქმის ობიექტური ჭეშმარიტების გარკვევაში დაეხმარება“, - აცხადებს მეხრიშვილი.
ადვოკატი აღნიშნავს, რომ დეკანოზის პასუხებით მეუფე დიმიტრისთვის ბევრი საკითხი გამჭვირვალე გახდა.
„დეკანოზს განცდა დარჩა, რომ მეუფე ამ საუბრის შედეგად კმაყოფილი წავიდა, რადგან მისთვის საინტერესო ბევრ კითხვას გაეცა პასუხი და ბევრი ისეთი ფაქტობრივი გარემოება, რომელსაც აქამდე კითხვის ნიშანი ჰქონდა, მეუფისთის გამვჭირვალე გახდა. ამით მამა გიორგი კმაყოფილი დარჩა. საბოლოო ჯამში შეიძლება ითქვას, რომ ეს შეხვედრა ორმხრივად სასარგებლო იყო, როგორც მეუფე დიმიტრისთვის და ზოგადად, საპატრიარქოსთვის, ასევე მამა გიორგისთვისაც“, - აღნიშნავს პაატა მეხრიშვილი.
როგორც ადვოკატი აცხადებს, მათ „სასამართლო მეგობრის“ მომზადების სურვილი აქვთ, რისი ნებაც სასამართლომ არ დართო.
„სასამართლოს მივმართეთ მოეცათ უფლება საქმის მასალები გადაგვეცა ერთ-ერთი პროფესორისთვის, რომელიც ამ საქმეზე „სასამართლო მეგობარს“ მოამზადებდა და სასამართლოში თავის პროფესიულ მოსაზრებას დააფიქსირებდა. სამწუხაროდ, სასამართლომ ამაზეც უარი გვითხრა. ვეძებთ სამართლებრივ გზებსა და მეთოდებს იმისთვის, რომ საბოლო ჯამში ასეთი „სასამართლო მეგობარი“ მოვამზადოთ“, - აღნიშნავს ადვოკატი.
