ევროპარლამენტმა შენგენის ზონაში უვიზოდ მოგზაურებისთვის ახალი რეგულაციების დაწესებას მხარი დაუჭირა. გადაწყვეტილებას ხმა 477 დეპუტატმა მისცა, წინააღმდეგ 139 გამოვიდა, 50-მა კი თავი შეიკავა.
ახალი რეგულაციით, მესამე ქვეყნის მოქალაქეებს, რომლებიც ევროკავშირთან უვიზო რეჟიმით სარგებლობენ, ავტორიზაციის ელექტრონულ სისტემაში სამგზავრო ნებართვის აღება მოუწევთ.
აპლიკანტმა სპეციალურად შექმნილ საიტზე ონლაინ-აპლიკაციის შესავსებად უნდა ჩაწეროს პერსონალური და სამგზავრო დოკუმენტის მონაცემები, ასევე განათლებისა და საქმიანობის შესახებ ინფორმაცია.
კითხვები აპლიკანტის ჯანმრთელობის მდგომარეობის შესახებ ინფორმაციასაც შეეხება. მონაცემებს ევროპოლისა და ინტერპოლის შესაბამისი ორგანოები გადაამოწმებენ. ახალი რეგულაცია 2020 წლიდან უნდა ამოქმედდეს.
