"კრიმინალის წინააღმდეგ პოლიტიკა მკაცრი უნდა იყოს და პოლიტიკური მიზანშეწონილობის გამო, მოძალადეების დაუსჯელობა არ უნდა ხდებოდეს", - ამის შესახებ „ევროპული საქართველოს“ ერთ-ერთმა ლიდერმა გიგა ბოკერიამ სოფელ ყიზილაჯლოში მომხდართან დაკავშირებით განაცხადა.
ბოკერიას თქმით, აღნიშნული ინციდენტი ძალიან შემაშფოთებელია.
"არ მაქვს საფუძველი, პოლიტიკას დავუკავშირო, თუ არ დავუკავშირო ეს ინციდენტი. ძალიან შემაშფოთებელი ინციდენტია, პირველ რიგში, რა თქმა უნდა, გამოჯანმრთელება უნდა ვუსურვოთ დაზარალებულებს და იმედი მაქვს, რომ მათი ჯანმრთელობა სწრაფად გაუმჯობესდება. სამართალდამცველებს სწრაფი გამოძიება და დამნაშავეების დასჯა უნდა მოვთხოვოთ. ჩვენ არ გვაქვს არანაირი ინფორმაცია გარდა იმისა, რაც საჯაროდ არის ცნობილი მედიისა და საზოგადოებისთვის. თუმცა ზოგადად ეს ტენდენცია ბოლო წლებია მიდის, როცა ქვეყანაში მატულობს კრიმინალი და ძალადობა. ეს არის დიდი პრობლემა“, - აღნიშნა გიგა ბოკერიამ.
