ფინანსთა სამინისტრო ბიუჯეტის გადასახდელების აღრიცხვის გაუმჯობესებას და სრულყოფას გეგმავს, რაც ბიუჯეტის გამჭვირვალობის გარანტია იქნება. ამ მიზნით, პარლამენტში ფინანსთა მინისტრის ბრძანების პროექტი- "საქართველოს საბიუჯეტო კლასიფიკაციის დამტკიცების თაობაზე" შევიდა, რომლის მუხლობრივ განხილვასაც პარლამენტი უახლოეს დღეებში დაიწყებს.
ფინანსთა სამინისტროში განმარტავენ, რომ ახალი საბიუჯეტო კლასიფიკაცია შესაძლებლობას იძლევა უფრო დეტალურად იქნას აღრიცხული საბიუჯეტო გადასახდელები.
გარდა ამისა, ბრძანების პროექტის დანართში თავმოყრილი იქნება შესაბამის კლასიფიკაციებთან დაკავშირებულ უფრო დეტალიზებული ცხრილები, რომელთა მიხედვითაც საბიუჯეტო ორგანიზაციებმა გადახდების განხორციელების დროს საქართველოს სახელმწიფო ხაზინასა და შესაბამის საფინანსო ორგანოებს, გადასახდელებზე დეტალური ინფორმაცია, უნდა წარუდგინონ.
საბოლოო ჯამში, აღნიშნული ცვლილებები საშუალებას იძლევა საბიუჯეტო კლასიფიკაცია უფრო ინფორმაციული და გამჭვირვალე იყოს.
საბიუჯეტო კლასიფიკაციაში ცვლილებების პროექტი ახალი საბიუჯეტო კოდექსის პარალერულად მომზადდა.
ფინანსთა სამინისტროს ინფორმაციით, წლის პირველ ნახევარში ელექტრონული ხაზინის ფუნქციონირებისათვის შესაბამისი პროგრამა (E_Treasury) შემუშავდა, რომელშიც ყველა მხარჯავი დაწესებულება ჩაერთვება და რომლის მიხედვითაც განხორციელდება როგორც გადასახდელების გაწევა, ასევე მათი აღრიცხვაც.
წარმოდგენილი ბრძანების პროექტით კლასიფიკაციას დაემატა "ბიუჯეტის ბალანსის ფორმა", ვინაიდან ამ ფორმის მიხედვით დგება შესაბამისი ბიუჯეტის ბალანსი.