ელექტროგადამცემ ხაზ "ველი-2"-ზე ახალი, სარელეო დაცვის ციფრული მოწყობილობები დამონტაჟდა. საქართველოს სახელმწიფო ელექტროსისტემაში განმარტავენ, რომ აღნიშნული მოწყობილობის მაკომპლექტებელი ნაწილები შუამავლის გარეშე, უშუალოდ მწარმოებლებისგან იქნა შეძენილი, ხოლო აწყობა და გაშვება სსე-ის ძალებით განხორციელდა.
"წელს პირველად, ჩვენი კომპანიის რესურსებით, ჩვენივე თანამშრომლებმა დაამონტაჟეს სარელეო დაცვის ციფრული მოწყობილობა. მსგავსი სახის სამუშაოებს საქართველოში მხოლოდ უცხოელი სპეციალისტები ახორციელებენ, ჩვენმა პროფესიონალებმა კი ამ სამუშაოს არაჩვეულებრივად გაართვეს თავი, რითაც თითქმის ორჯერ დაიზოგა კომპანიის დანახარჯები. საკმაოდ მოცულობითი სამუშაოები ჩატარდა: სარელეო ციფრული დაცვების პროექტირება და მართვის სისტემაში ინტეგრირება, კარადის აწყობა და ექსპლუატაციაში გაშვება", - განაცხადა სსე-ის რეაბილიტაციის მმართველმა სულხან ზუმბურიძემ.
ზუმბურიძე აცხადებს, რომ თანამედროვე სარელეო დაცვის ციფრული მოწყობილობები მნიშვნელოვნად გაზრდის ხაზის იმედიანობას და მინიმუმამდე შეამცირებს სისტემაში ავარიულ სიტუაციებს.