რუსთავში, დევნილთა ჩასახლების ობიექტში, ხელი მოეწერა ევროკავშირთან ხელშეკრულებას მორიგი ტრანშის გადმოცემის შესახებ. ევროკავშირი საქართველოს მთავრობას 43.5 მლნ ევროს ოდენობის ფინანსურ დახმარებას გამოუყოფს, რომელიც იძულებით გადაადგილებულ პირთა სამოქმედო გეგმის რეალიზებასა და მათ გრძელვადიან განსახლებას მოხმარდება.
2008 წლის კონფლიქტის შემდეგ ევროკავშირის მიერ საქართველოსთვის გაწეული დახმარების დიდი ნაწილი გამიზნული იყო იმ ადამიანებისთვის, ვინც ომის გამო ყველაფერი დაკარგა და იძულებული იყო სახლი მიეტოვებინა.
ფინანსური დახმარების მესამე ტალღა 5000-მდე დევნილი ოჯახის საცხოვრებელი პირობების გაუმჯობესებას მოხმარდება. თანხის ნახევარზე მეტი კომპაქტური განსახლების ცენტრების რეაბილიტაციასა და ახალი ბინების მშენებლობაზე დაიხარჯება; დაახლოებით 10 მილიონი ევრო - აუცილებელი ინფრასტრუქტურის (საავადმყოფოების, სკოლებისა და გზების) მშენებლობისა და რეაბილიტაციისათვის; დაახლოებით 5 მილიონი ევრო კი ამ თემებში კერძო ეკონომიკური ინიციატივების გაძლიერებას მოხმარდება.
აღნიშნული დახმარებით ევროკავშირი ხელს შეუწყობს იძულებით გადაადგილებულ პირთათვის უკეთესი საცხოვრებელი პირობების შექმნას და მათ სოციალურ-ეკონომიკურ ინტეგრაციას.
დღეს რუსთავში, კოლექტიური განსახლების ცენტრში ხელმოწერილი ხელშეკრულება დაფინანსების თაობაზე კიდევ ერთხელ ადასტურებს იმ დიდ მხარდაჭერას, რომელსაც ევროკავშირი საქართველოს მოსახლეობას ბოლო ორი ათწლეულის განმავლობაში უწევს. დახმარების ეს ახალი თანხა ფინანსთა სამინისტროს საშუალებით განაწილდება, ხოლო შესაბამის ღონისძიებებს განახოციელებენ საქართველოს ოკუპირებული ტერიტორიებიდან იძულებით გადაადგილებულ პირთა, განსახლებისა და ლტოლვილთა სამინისტრო, მუნიციპალური განვითარების ფონდი, რეგიონული განვითარებისა და ინფრასტრუქტურის სამინისტრო.
საქართველოს მხრიდან ხელშეკრულებას ხელი მოაწერა ფინანსთა მინისტრმა კახა ბაინდურაშვილმა, ხოლო ხელმოწერის ცერემონიას დაესწრნენ საქართველოს ოკუპირებული ტერიტორიებიდან იძულებით გადაადგილებულ პირთა, განსახლებისა და ლტოლვილთა მინისტრი კობა სუბელიანი და ევროკავშირის წარმომადგენლობის ხელმძღვანელი ელჩი პერ ეკლუნდი.
მისი განცხადებით, "საქართველოს ხელისუფლების მიერ იძულებით გადაადგილებულ პირთა ხელშეწყობისა და დაცვის ღონისძიებების მხარდაჭერის თაობაზე ევროკავშირის მიერ დღეს ნაკისრი ვალდებულება ერთობლივი და კოორდინირებული ძალისხმევის შედეგია. ეს არ იქნება ადვილი ამოცანა, მაგრამ ჩვენ გვაქვს შესაძლებლობა, ერთად მივაღწიოთ დევნილთა ინტეგრაციას საზოგადოებაში. 30000-ზე მეტი ოჯახს კვლავაც ესაჭიროება გრძელვადიანი განსახლება, ამიტომ ხელისუფლებამ კიდევ უნდა გაზარდოს ძალისხმევა მათი საცხოვრებელი პირობებისა და ეკონომიკური მდგომარეობის გასაუმჯობესებლად.
კობა სუბელიანის თქმით, აღნიშნული თანხა მთლიანად დევნილთაAსაკეთილდღეოდ დაიხარჯება.
"ეს თანხა გულისხმობს დევნილი ოჯახებისთვის კომპაქტური ცენტრების გარემონტებას და დაკანონებას, ასევე კარკასული ობიექტების ბინებად გადაკეთებას და დევნილებისთვის საკუთრებაში გადაცემას. ეს თანხა ასევე გულისხმობს დევნილთა დასაქმებას, რადგან სარემონტო სამუშაოში თავად დევნილები ღებულობენ მონაწილეობას", _ განაცხადა მან.
43.5 მილიონი ევრო არის ნაწილი 500-მილიონიანი ევროს ოდენობის პაკეტისა, რომელიც ევროკავშირმა საქართველოს 2008 წლის აგვისტოს კონფლიქტის შემდეგ გამოუყო.