„საკრებულო არ არის ის ადგილი, სადაც ოპოზიცია სხდომის ჩაშლას თავისი ხუშტურების შესაბამისად მოინდომებს“, - განაცხადა თბილისის საკრებულოს უმრავლესობის წევრმა ჯაბა ჯიშკარიანმა საკრებულოს სხდომაზე განვითარებულ მოვლენებთან დაკავშირებით.
მისი თქმით, საკრებულო არის ქალაქის წარმომადგენლობითი ორგანო, რომელიც უფლებამოსილია, ნებისმიერი მოქალაქისა თუ კომპანიის განცხადება განიხილოს და კანონის შესაბამისად დააკმაყოფილოს.
„რაც შეეხება იმ აურზაურს, რომელიც დღეს ოპოზიციამ შექმნა, ეს იყო წინასაარჩევნოდ შოუს დადგმისა და საზოგადოების შეცდომაში შეყვანის მცდელობა. მათი განცხადება, თითქოს, დღეს ჩვენ რომელიმე კომპანიას ქონებას ერთ ლარად გადავცემთ, ყურით მოთრეული ჭორია და მხოლოდ მათ პოლიტიკურ ველზე ტივტივს ემსახურება.
დღეს საკრებულოს სხდომაზე განიხილება ამ ორი ნაკვეთისთვის ზონის შეცვლის საკითხი და არა მისი ერთ, ათ, ან თუნდაც მილიონ ლარად ვინმესთვის გადაცემა.
ის უპასუხისმგებლო განცხადებები, თითქოს, ვინმეს ქონებას ერთ ლარად გადავცემთ, არის სრული ტყუილი“, - აღნიშნა ჯაბა ჯიშკარიანმა.
რაც შეეხება საკრებულოში პოლიციის მობილიზებას, ჯაბა ჯიშკარიანმა აღნიშნა, რომ საკრებულოს დარბაზი არ არის პოლიტიკური შოუების დადგმის ადგილი და კანონი პოლიციას საკრებულოს წევრებისთვის სხდომაზე უსაფრთხო გარემოს უზრუნველყოფას ავალდებულებს.