დღეს, თბილისის საქალაქო სასამართლოში სანდრო გირგვლიანის საქმეში ბრალდებულ მიხეილ სააკაშვილის სასამართლო პროცესი რამდენიმე საათის განმავლობაში მიმდინარეობდა. პროცესი სწორედ, ბრალდების მხარის მტკიცებულებების გამოკვლევით განახლდა.
საქმის პროკურორის, ირაკლი ნადარეიშვილის განცხადებას „ჯი-ეიჩ-ენ-თან“ ყოფილი პრეზიდენტის, მიხეილ სააკაშვილის ადვოკატი, დავით კაკოიშვილი გამოეხმაურა. პროცესის დაწყებამდე, ნადარეიშვილმა განაცხადა, რომ სასამართლოზე წარდგენილი აუდიო-ვიდეო მასალებით დასტურდება რომ მიხეილ სააკაშვილი გირგვლანის საქმეში მსჯავრდებულებს მფარველობდა და შეწყალების დაპირებაც გასცა. ამ განცხადებას კაკოიშვილი ტყუილს უწოდებს.
„ამ საქმეზე არცერთ მედიასაშუალებას კომენტარს არ ვაძლევ, ამიტომ საკითხის დაწვრილებით განხილვას არ დავიწყებ. თუმცა, პირდაპირ შემიძლია გითხრათ, რომ პროკურორის ეს სიტყვები ტყუილია. პროკურორი ყოველთვის იმას ამბობს, რაც ბრალდების მხარის პოზიციას აწყობს და უმრავლეს შემთხვევაში, ეს ტყუილია ხოლმე.
სიმართლე თუ გაინტერესებთ, ეს ჩანაწერები საქმესთან არანაირ შემხებლობაშია. ეს აუდიო-ვიდეო მასალები ჟურნალისტების მიერ მომზადებული სიუჟეტებია. საქმე ეხება შეწყალების უფლების გამოყენებას, სააკაშვილი მსჯავრდებულებს რომ მფარველობდა, ამის მტკიცებულება საქმეში არ დევს“, - განაცხადა კაკოიშვილმა.
თბილისის საქალაქო სასამართლოში ბრალდების მხარემ წარადგინა დისკები, სადაც 2006 წლიდან სააკაშვილის პრეზიდენტობის დასასრულამდე საჯარო გამოსვლები და საჯაროდ გადაცემული ინფორმაციებია.
სააკაშვილის უფლებამოსილების ბოროტად გამოყენებას ედავებიან. მან გირგვლიანის საქმეში მსჯავრდებულები განაჩენის გამოტანიდან 2 წელიწადში 2008 წელს შეიწყალა.
სტრასბურგში არსებულმა ევროპის ადამიანის უფლებათა სასამართლომ 2011 წელს, ნაწილობრივ დააკმაყოფილა საქართველოს მთავრობის წინააღმდეგ გირგვლიანის ოჯახის სარჩელი და განაცხადა, რომ სანდრო გირგვლიანის მკვლელობის საქმის გამოძიებას "აშკარად აკლდა საჭირო დამოუკიდებლობა, მიუკერძოებლობა, ობიექტურობა და საფუძვლიანობა“.
