ჩვენი პრიორიტეტი უნდა იყოს ადამიანი და არა მანქანა, - ამის შესახებ თბილისის მერობის დამოუკიდებელმა კანდიდატმა ალეკო ელისაშვილმა მეტროსადგურ “ახმეტელის” ტერიტორიაზე შეკრებილ მოსახლეობასთან სატრანსპორტო მიმართულების განვითარებისთვის მისეული ხედვის წარდგენისას განაცხადა.
ელისაშვილის თქმით, აუცილებელია ტრამვაის შემოყვანა, რადგან ეს არის მეტროს იაფი ალტერნატივა.
"ის მიდგომა, რომ ახალი გზები და ესტაკადები მოაგვარებს საცობის პრობლემას, არის ტყუილი, საზოგადოებრივი ტრანსპორტის ინტეგრირებული შექმნა არის მთავარი. ჩვენი პრიორიტეტი უნდა იყოს ადამიანი და არა მანქანა. სულ სხვაგვარად უნდა აეწყოს დედაქალაქის სატრანსპორტო სისტემა, სადაც პრიორიტეტი მიენიჭება მეტროს. მასზე უნდა დაშენდეს ავტობუსის ქსელი, სამარშუტო ტაქსების ქსელი და ა. შ. აუცილებელი კომპონენტია ტრამვაის შემოყვანა, რადგან ეს არის მეტროს იაფი ალტერნატივა და არავის უნდა ჰქონდეს იმის ილუზია, რომ კომუნისტების დროს დაპროექტებული მეტროს პროექტი დასრულდება, ეს წარმოუდგენელია. ამავდროულად გადაიხედება თბილისის მიკროავტობუსთან გაფორმებული ხელშეკრულება, სადაც პრიორიტეტი უნდა მიენიჭოს როგორც მოქალაქეებს, ასევე მძღოლებს. არ შეიძლება მძღოლს 120 ლარის ვალი ჰქონდეს სამუშაოს დაწყებამდე და ის ამ თანხის ამოსაღებად აკეთებდეს ყველაფერს. რა თქმა უნდა, ჩვენ ხელშეუკრულებას გავუუქმებთ “სითი პარკს”, რომელიც არაფერს აკეთებს, შემოვა დედაქალაქში ისეთი კომპანია, რომელიც უზრუნველყოფს საპარკინგე ინფრასტრუქტურას”, - განაცხადა ალეკო ელისაშვილმა.
