კოლუმბიის ქალაქ კატატუმბოში ჰოლანდიელი ჟურნალისტი დერკ ბოლტი და მისი ოპერატორი იუჯინ ფოლენდერი გაიტაცეს.
კოლუმბიის მთავრობა ამტკიცებს, რომ ნიდერლანდების მოქალაქეები ულტრამემარცხენე შეიარაღებულმა დაჯგუფებამ, - კოლუმბიის ეროვნულ-განმათავისუფლებელმა არმიამ, ტყვეებად აიყვანა. ჟურნალისტების გამოსახსნელად ქვეყნის ჩრდილო აღმოსავლეთით კოლუმბიის თავდაცვის სამინისტრომ სპეცრაზმი გაგზავნა. ნიდერლანდების მთავრობა საკუთარი მოქალაქეების დაუყოვნებლივ გათავისუფლებას ითხოვს.
ტელეგადაცემა Spoorloos-ის წამყვანი დერკ ბოლტი კატატუმბოში კოლუმბიელი ქალის მოსაძებნად ჩავიდა, რომელიც ნიდერლანდებში გაშვილებული კოლუმბიელი ბავშვის ბიოლოგიური დედაა. გადაცემის ფორმატი სწორედ დაკარგული ნათესავებისა და მშობლების პოვნას ითვალისწინებს.
კოლუმბიის ეროვნულ-განმათავისუფლებელმა არმიამ შარშან ესპანელი ჟურნალისტიც გაიტაცა, თუმცა იგი რამდენიმე დღეში გაათავისუფლეს.
