დემოკრატიის ახალ ტალღას თავის აქტივში შაშკინი ნამდვილად ვერ ჩაიწერს, მაგრამ იგი მაინც განაგრძობს კარიერულ წინსვლას, იმის მიუხედავად, რომ შაშკინმა ვერც ერთ სფეროში (სასჯელაღსრულება და განათლება) თავისი პოზიტიური კვალის დატოვება ვერ შეძლო.

შაშკინს უკვე, ფაქტობრივად, დაკომპლექტებული აქვს სახელმწიფო კანცელარიის ახალი შემადგენლობა. კანცელარიაში შაშკინის დიდ ამალას, რომელიც მას სასჯელაღსრულების სამინისტროდან განათლებაშიც გადაჰყვა, მალე ვიხილავთ.

"ჯი-ეიჩ-ენის" ინფორმაციით, გასულ კვირას ფინანსთა სამინისტროში რეორგანიზაციის მოტივით თანამშრომლებს განცხადებები უკვე დააწერინეს. სამინისტროს კულუარებში ღიად საუბრობენ, რომ "ნიკა ბრუნდება" და ეს დაბრუნება ახალი საგადასახადო კოდექსის "გაგებითა" და პროფესიონალის მიერ შესაბამისი ადმინისტრირების მოტივით აიხსნება. თუმცა სარწმუნო წყაროები იმასაც ამბობენ, რომ თავად გილაურს ენერგეტიკის სამინისტროში გადასვლა ერჩია.

ეკონომიკის მინისტრის პოსტზე რამდენიმე კანდიდატურა განიხილება და საბოლოო გადაწყვეტილება ჯერაც მიღებული არაა. ვატო ლეჟავა, რომელიც იმთავითვე აღიქმება კახა ბენდუქიძის კადრად, დავით ქარსელაძე, რომელმაც ახლახან დატოვა "ფინანსური პოლიციის" შეფის თანამდებობა, კახა ბაინდურაშვილი, რომელსაც ფინანსთა მინისტრის პოსტის დატოვება უწევს, ეკონომიკის მინისტრის თანამდებობზე განიხილებიან. თუმცა საბოლოო გადაწყვეტილება მიღებული ჯერაც არაა, მით უფრო, რომ პრეზიდენტი წინამორბედი მინისტრების მიერ განხორციელებული საინვესტიციო პოლიტიკით უკმაყოფილო იყო და ამჟამად ქვეყნის ფარგლ;ებს გარეთ მყოფ რამდენიმე პერსონასთანაც მინდინარებს მოლაპარაკება, რომლებიც სხვადასხვა საფინანსო და საინვესტიციო ფონდში საქმიანობენ.

არ არის გამორიცხული, ეკონომიკის სამინისტროსთან გაერთიანდეს ინფრასტრუქტურისა და რეგიონალური მართვის სამინისტრო და გაერთიანებულ უწყებას დავით ტყეშელაშვილი ჩაუდგეს სათავეში.

კვლავ დგას დღის წესრიგში ჯანდაცვის მინისტრის საკითხიც. წარუმატებელი სადაზღვევო პოლიტიკა, "ბლოკ ჯორჯიას" თემა და სხვა სოციალური საკითხები, რომელიც ხელისუფლებას მუდმივი თავის მართლების პოზიციაში ამყოფებს, ალექსანდრე კვიტაშვილისთვის საბოლოო ვერდიქტის გამოტანის მიზეზი ხდება.

ჯანდაცვაის სამინიტროში ხელისუფლება რეფორამატორული გადაწყვეტილების მიღებას გეგმავს და მინისტრის პოსტს ოპოზიციას, სავარაუდოდ, "ქრისტიან-დემოკრატებს", კონკრეტულად კი მაგდა ანიკაშვილს შესთავაზებს. მისი მინისტრად დანიშვნის საკითხი რამდენიმე თვეა განიხილება, თუმცა აქამდე ფორმა ვერ მოიძებნა. ახლა, როდესაც თბილისის საკრებულოში შესაბამისი კომისია ოპოზიციონერ ვიქტორ დოლიძეს ჩააბარეს, მთავრობა აღებული კურსის ერთგულებას გამოაცხადებს და ანიკაშვილის გამინისტრების ფორმაც მოძენილი იქნება.

მართალია, აღნიშნული გადაწყვეტილებით ხელისუფლება კიდევ ერთხელ ეტყვის უარს გუბერნატორის პოსტზე ყველაზე დიდი პერიოდით შემორჩენილ ზაზა გოროზიას, მაგრამ თუ მას თანაგუნდელებმა ამჯერად მაინც უერთგულეს, სამეგრელოს გუბერნატორის გამინისტრებაც რეალობად იქცევა. ისე, გოროზიას კანდიდატურა გარემოს დაცვის მინისტრის პოსტზედაც განიხილება. ფაქტია, რომ "მიშა მაგარია" გოგა ხაჩიძისთვის სამინისტროში არსებული დანაშაულებრივი სქემების მიმართ არასათანადო ბრძოლის გამო ინდულგენციად ვერ იქცევა. თუმცა ჯანდაცვის სამინისტროს მსგავსად, შესაძლოა, ეს უწყებაც ოპოზიციის წარმომადგენელს ჩაბარდეს, მით უფრო, რომ გია თორთლაძე დაჟინებით მოითხოვს მისი თანაგუნდელების "ღირსეულად დაფასებას". იგივე სურვილი და მოთხოვნები ეროვნულ-დემოკრატიულ პარტიასაც აქვს.

სოფლის მეურნეობის მინისტრ ბაკურ კვეზერელის მიერ თანამდებობის შენარჩუნებისთვის გადადგმულ ნაბიჯად განიხილება მის მიერ სურსათის უვნებლობის, ვეტერინარიისა და მცენარეთა დაცვის დეპარტამენტის ხელმძღვანელის სასწრაფო წესით გათავისუფლება. თუმცა რამდენად უშველის კვეზერელს ეს საკადრო გადაწყვეტილება, ჯერაც უცნობია.

გასაკუთრებულ ყურადღებას იწვევს განათლების მინისტრის პოსტი, სადაც დიმიტრი შაშკინი მის ერთ-ერთ ამჟამინდელ მოადგილეს მოიაზრებს. შაშკინი კატეგორიუკლად ეწინააღმდეგება მინისტრის პოსტზე მაია მიმინოშვილის დანიშვნას, რომელსაც ხელისუფლებაში საკმაოდ ბევრი ლობისტი ჰყავს. ამიტომაც განათლების მინისტრის კანდიდატურა ყველაზე ბოლოს შეთანხმდება.

სავარაუდოდ, ცვლილება შეეხება სასჯელაღსრულების, პრობაციისა და იურიდიული დახმარების საკითხთა სამინისტროს. მინისტრმა კალმახელიძემ ნამდვილად ვერ გაამართლა თავისი მომხიბვლელობით გაცემული ავანსები და პენიტენციალური სისტემა ვარდების რევოლუციის მთავრობის ერთ-ერთ მტკივნეულ თემად რჩება. განიხილება წინადადება სამინიტროს იუსტიციის სამინისტროს შემადგენლობაში შესვლის შესახებ. ერთადერთი წინააღმდეგობას სასჯელაღსრულებისა და პროკურატურის ერთი სამინისტროს ქუდის ქვეშ არსებობა წარმოადგენს. თუ ანალოგიების საფუძველზე მისი დაძლევის შესაძლებლობა მოიძებნა, ამ რეორგანიზაციის განხორციელებაც ცხელი ზაფხულის პირობებში მოხდება.

ბოლო ხანს აქტუალური გახდა არასამთავრობო ორგაზიაციის "სამართლიანობისთვის" ხელმძღვანელის, ვერა ქობალიას პერსონა. მისი კანდიდატურა ხან აფხაზეთის მათავრობის თავმჯდომარედ, ხან ეკონომიკის, ხანაც ლტოლვილთა და განსახლების მინისტრად გაჟღერდა. ასე რომ, არ არის გამორიცხული, ქობალია რომელიმე სამინისტროს, უფრო კი აფხაზეთის მთავრობის თავმჯდომარედ ვიხილოთ.

ვანო მერაბიშვილი, ზურაბ ადეიშვილი, ნიკოლოზ რურუა, გრიგოლ ვაშაძე და ბაჩო ახალაია - ამ ეტაპზე ის კვინტეტია, რომელთა შეცვლა ან ადგილმონაცვლეობა ნამდვილად არ განიხილება. სხვათათვის კი, შესაძლოა, ცხოვრების ახალი ეტაპი დაიწყოს.

გოჩა მირცხულავა, "ჯი-ეიჩ-ენი"