მთავრობის უგუნური და მავნებლური ეკონომიკური პოლიტიკის შედეგად, ინფლაციის წლიუმა მაჩვენებელმა მარტში 5.4% შეადგინა, - განაცხადა დღეს გამართულ ბრიფინგზე ,,ევროპული საქართველოს“ წევრმა ზვიად ხორგუაშვილმა.
,,ბიძინა ივანიშვილის მმართველობის პერიოდში ხალხი გაღარიბდა, შემცირდა მრავალი ოჯახის შემოსავალი, ისინი სულ უფრო ნაკლებს მოიხმარენ. იმის ნაცვლად, რომ გადასახადები დაეწია და ამით შვება მიეცა ხალხისთვის და ბიზნესისთვის, რომელიც ქმნის სამუშაო ადგილებს, მთავრობამ გადასახადები აწია ბენზინსა და დიზელზე, რასაც საქართველოს მოქალაქეთა აბსოლუტური უმრავლესობა საკუთარ ჯიბეზე გრძნობს.’’
როგორც მან აღნიშნა, მთავრობამ გაზარდა გადასახადები, აქციზი და, შესაბამისად, გაძვირდა ბენზინი, დიზელი, გაზი. ამ ნაბიჯმა დააჩქარა ფასების ზრდა ფართო მოხმარების საგნებზე, როგორიცაა პროდუქტი, მედიკამენტი, რაც ისედაც ძვირდებოდა ლარის დევალვაციის ფონზე, ასევე გაძვირდა ტრანსპორტი.
,,მთავრობის ეკონომიკური პოლიტიკა აფერხებს ეკონომიკურ ზრდას და აღრმავებს ეკონომიკურ კრიზისს. დაბალი ეკონომიკური ზრდა კიდევ უფრო აუარესებს სოციალურ და ეკონომიკურ ფონს და ზრდის უმუშევრობას. ქართული ოცნების ხელისუფლება ჯიუტად უარს ამბობს გადასახადების შემცირებასა და საბიუჯეტო ხარჯების ფლანგვის პრაქტიკის დასრულებაზე, რაც რთული ეკონომიკური მდგომარეობის დროს აუცილებლად გადასადგმელი ნაბიჯებია’’,- განაცხადა ზვიად ხორგუაშვილმა.
