16 აპრილს მმართველობის საპრეზიდენტო ფორმაზე გადავალთ და სრულიად ახალი თურქეთი დაიბადება, - ამის შესახებ, ადგილობრივი მედიის ცნობით, ქვეყნის პრეზიდენტმა რეჯეფ თაიფ ერდოღანმა ანკარაში სიტყვით გამოსვლისას განაცხადა.
„მეტი ვერაფრით დაგვემუქრებიან, ვერც ევროკავშირში გაწევრიანებით, ვერც „რეადმისიის შესახებ“ შეთანხმებით. მორჩა, ეს დრო დასრულდა. 16 აპრილს მმართველობის საპრეზიდენტო ფორმაზე გადავალთ და სრულიად ახალი თურქეთი დაიბადება. წლების განმავლობაში ევროკავშირი მიგვითითებდა თავის კრიტერიუმებზე, ახლა კი თვითონ თელავენ თავიანთ კრიტერიუმებს. 16 აპრილის რეფერენდუმის შემდეგ მოლაპარაკებების მაგიდას მივუსხდებით, დავილაპარაკებთ. როგორც ახლა, ასე საქმე ვერ გაგრძელდება“, - აღნიშნა თურქეთის პრეზიდენტმა.
