საპარლამენტო ოპოზიციის წარმომადგენელი გურამ ჩახვაძე ითხოვს, გზით სარგებლობის საფასურის დაწესებისას მთავრობამ გაითვალისწინოს ის საკითხი, რომ არ მოხდეს ტვირთების გადამისამართება. იგი მიიჩნევს, რომ საქართველოს რეზიდენტი პირები აღნიშნული საფასურის გადახდისგან უნდა იქნენ გათავისუფლებულნი. ეს მოთხოვნა ჩახვაძემ დღეს პარლამენტში დარგობრივი ეკონომიკის კომიტეტის სხდომაზე მთავრობის ინიციატივის განხილვისას დააყენა, რომელიც სატრანზიტო ტვირთების გავლისათვის გზით სარგებლობის საფასურის დაწესებას ითვალისწინებს.
ჩახვაძე მიიჩნევს, რომ საქართველოს მოქალაქეები ბიუჯეტში გადასახადების გადახის გზების მოვლისათვის საფასურს ისედაც იხდიან და აცხადებს, რომ საქართველოს მოქალაქეები გზით სარგებლობის საფასურის გადახდისგან უნდა გათავისუფლდნენ.
თუმცა როგორც მთავრობის საპარლამენტო მდივანმა გია ხუროშვილმა განაცხადა, ასეთ შემთხვევაში იქნება საშიშროება, რომ უცხოური სატრანზიტო კომპანიები გააკეთებენ საქართველოში დაფუძნების რეგისტრაციას და ამ შემთხვევაში მთავრობას ბერკეტი არ ექნება იმისათვის, რომ აღნიშნული ინიციატივა განახორციელოს. ხუროშვილი მთავრობის მიერ ამ მოთხოვნის გაზიარებას კატეგორიულად გამრიცხავს.
შეგახსენებთ, რომ მთავრობის ინიციატივით წესდება გზით სარგებლობის საფასური, რომელსაც გადაიხდიან სატრანზიტო ტვირთების მფლობელები, საბაჟო პუნქტების გადაკვეთისას საფასურის რაოდენობას კი მთავრობა საგანგებო დადგენილებით განსაზღვრავს.
