მთავრობის საპარლამენტო მდივანი გია ხუროშვილი დარწმუნებულია, რომ ქვეყანაში გზების დაგებით "ხელისუფლება მოსახლეობას საჩუქარს უკეთებს და მოწყალებას იღებს". ამის შესახებ განცხადება ხუროშვილმა დღეს პარლამენტში დარგობრივი ეკონომიკის კომიტეტის სხდომაზე გზით სარგებლობის საფასურის დაწესების შესახებ მთავრობის ინიციატივის განხილვისას გააკეთა.
"ხელისუფლება მოსახლეობას საჩუქარს უკეთებს და მოწყალებას იღებს. ამ საჩუქარს კი გაფრთხილება სჭირდება", - აცხადებს ხუროშვილი და დასძენს, რომ სწორედ გზების მოვლისთვის წესდება აღნიშნული საფასური. აღსანიშნავია, რომ ხუროშვილმა ეს შეხედულება მას შემდეგაც არ შეიცვალა, რაც საპარლამენტო ოპოზიციის წარმომადგენელმა გურამ ჩახვაძემ მას განუმარტა, რომ "გზები იგება ბიუჯეტიდან. ბიუჯეტი კი მთავრობის საკუთრება არ არის".
"ეს არის სწორედ მოქალაქეების მიერ გადახდილი თანხა და მეორე - გზების გადასაკეთებლად მთავრობა იღებს გრძელვადიან სესხებს, რაც ისევ მოსახლეობის დასაფარია. ამიტომ თუკი გზები იგება ეს არც საჩუქარია და არც მოწყალება", - განაცხადა ჩახვაძემ. თუმცა როგროც ხუროშვილმა აღნიშნა, "გადასახადებს მაშინაც ვიხდიდით, როცა არც გზები იყო და არც შუქი. ამიტომ იმასთან შედარებით ეს მართლა საჩუქრად და მოწყალებად მიმაჩნია".
შეგახსენებთ, რომ მთავრობის ინიციატივით სატრანზიტო ტვირთებზე წესდება გზით სარგებლბს გადასახადი და გადასახადის გადახდა მოუწევთ იმათ, ვინც გადაკვეთენ საბაჟო პუნქტებს. ამასთან ეს ეხება მხოლოდ სატრანზიტო ტვირთებს და ჯერჯერობით არ ეხება სამგზავრო და მსუბუქ ავტომობილებს. რაც შეეხება საფასურს, მისი რაოდნეობის განსაზღვრა მთავრობის პრეროგატივა იქნება.
