ოფიციალური მონაცემებით, კახეთში სტიქიამ საკმაოდ დიდ მასშტაბებს მიაღწია და 5 მუნიციპალიტეტი - ახმეტა, თელავი, ყვარელი, ლაგოდეხი და გურჯაანი მოიცვა. წინასწარი ინფორმაციით სტიქიით გამოწვეული ზარალი 2 მილიონ ლარს აჭარბებს.
წყალდიდობამ ახმეტის ორ სოფელში საცხოვრებელი სახლები და სასოფლო სამეურნეო დანიშნულების მიწის ნაკვეთები დატბორა. წყალდიდობამ ახმეტა-თიანეთის დამაკავშირებელი გზის 100 მეტრიანი მონაკვეთი, ასევე სოფელ ნადუქნარის და შახვეტილას დამაკავშირებელი გზა წაიღო.
როგორც რადიო "ჰერეთს" კახეთში გუბერნატორის პირველმა მოადგილე გიორგი სიბაშვილმა განუცხადა, ყვარელში და მის 10 სოფელში მდინარე დურუჯმა დააზიანა სასოფლო-სამეურნეო სავარგულები, საავტომობილო გზები და დატბორა საცხოვრებელი სახლები.
"ყვარელში სასმელი წყლის გარეშეა დარჩენილი 6 სოფელი, ხოლო ბალღოჯიანში, ახალსოფელში და საბუეში წაქცეულია მაღალი ძაბვის ანძები. თელავის მუნიციპალიტეტში გადაუღებელმა წვიმებმა გამოიწვია მდინარეების: დიდხევის, ლოპოტის, სტორის, ჭიჭაყვის, კისისხევის, ვარდისუბნის და ვანთის ხევის ადიდება, რამაც მნიშვნელოვნად დააზარალა სოფლები: ლალისყური, ფშაველი, სანიორე, ართანა, ლაფანყური, ნაფარეული ვარდისუბანი და კისისხევი. გარდა ამისა, მოშლილია წყლის სათავე ნაგებობები, დაზიანებულია საავტომობილო გზები და ელექტროგადამცემი ხაზები. ანალოგიური მდგომარეობაა ლაგოდეხსა და გურჯაანში. ზარალს ამ დრომდე სპეციალური კომისიები ითვლიან", - განუცხადა რადიო "ჰერეთს" გიორგი სიბაშვილმა.
მისივე თქმით, სტიქიის მასშტაბები რეგიონში აღარ გაიზრდება.