"აშშ-ს რუსეთთან ურთიერთობის გაუმჯობესების დიდი სურვილი აქვს, თუმცა ეს მისი მეგობარი ქვეყნების ხარჯზე არ მოხდება", - ამის შესახებ აშშ-ს სახელმწიფო მდივნის მოადგილემ ფილიპ გორდონმა მარშალის ცენტში განაცხადა.
გორდონის განცხადებით, აშშ ოფიციალური რუსეთისგან ელოდება, რომ 12 აგვისტოს "ცეცხლის შეწყვეტის შესახებ" ხელშეკრულებით აღებულ ვალდებულებს შეასრულებს, რომელიც ძალის გამოუყენებლობას, საომარი ქმედებების შეწყვეტას და ჯარების ომამდე მდგომარეობის დაბრუნებას ითვალისწინებს.
"რუსეთის ჯარები ჯერ კიდევ იმყოფებიან აფხაზეთსა და სამხრეთ ოსეთში. თუმცა, "ცეცხლის შეწყვეტის შესახებ" ხელშეკრულება ავალდებულებთ მათ დაუბრუნდნენ იმ პოზიციებს, რომლზეც ომამდე იმყოფებოდნენ. რუსეთს ეს ვალდებულება არ შეუსრულებია. ამის ნაცვლად მათ აღიარეს სამხრეთ ოსეთისა და აფხაზეთი, რაც ჩვენთვის მიუღებელია და ამაზე ჩვენი პოზიცია მკვეთრად დავაფიქსირეთ", - განაცხადა გორდონმა.
მისივე თქმით, აუცილებელია, საქართველოს საკითხის განხილვისთვის მექანიზმები ჩამოყალიბდეს. ასევე საჭიროა ამ რეგიონში ვითარების შესახებ მეტი გამჭირვალობა იყოს.
"რუსეთი ამბობს, რომ მათ საერთაშორისო დამკვირვებლები - ეუთო და გერო არ სჭირდებათ. ამაზე ჩვენი პასუხია, ის არის, რომ მეტი გამჭირვალობისთვის აუცილებელია აფხაზეთში და სამხრეთ ოსეთში საერთაშორისო დამკვირვებლები და არასამთავრობო ორგანიზაციების შეშვება მოხდეს", - აღნიშნა გორდონმა.
