რამდენიმე ხნით ადრე მედია იუწყებოდა, რომ რუსეთმა ე.წ. სამხრეთ ოსეთის თითოეულ მაცხოვრებელზე 42 ათასი აშშ დოლარი გამოყო. ანალიტიკოსები კი აცხადებდნენ, რომ რუსეთის მიერ ამ ე.წ. რესპუბლიკის მხარდაჭერა განწირულია და იგი მოსკოვს ძალიან ძვირი დაუჯდება.

2008 წლის აგვისტოდან რუსეთმა ე.წ. სამხრეთ ოსეთის ეკონომიკის აღდგენისათვის 840 მილიონი აშშ დოლარი (26 მილიარდი რუსული რუბლი) გამოყო. ამავე პერიოდში კი დასავლეთმა საქართველოს აღდგენისათვის 4,5 მილიარდი აშშ დოლარი გამოუყო ანუ ერთ სულ მოსახლეზე 1200 აშშ დოლარი.

მიუხედავად რუსეთის დახმარებისა, ე.წ. სამხრეთ ოსეთში აღდგენითი სამუშაოები ძალიან ნელა მიმდინარეობს. კერძო სექტორი ძველებურად ნანგრევებში იმყოფება.

რამდენიმე ხნის წინ, რუსეთის პრემიერ-მინისტრმა ვლადიმერ პუტინმა ოს სეპარატისტთა ლიდერთან ედუარდ კოკოითთან შეხვედრაზე უკმაყოფილება გამოთქვა იმით, რომ ე.წ. სამხრეთ ოსეთის "მთავრობა" არაეფექტურად მუშაობს. ამის მიუხედავად 2010 წელს რუსეთი დამატებით 5,7 მილიარდი რუბლის გამოყოფას აპირებს.

ექსპერტების მონაცემებით, რეგიონში ამჟამად 30.000 ადამიანამდე ცხოვრობს: მათგან 17 ათასი ცხინვალში. 2008 წლის კონფლიქტის დროს ე..წ სამხრეთ ოსეთიდან 20 ათასი ეთნიკური ქართველი გამოიქცა. "Iნტერნატიონალ ჩრისის Gროუპ"-ის მონაცემებით, ამჟამად ე.წ. სამხრეთ ოსეთში მხოლოდ 2 500 მდე ქართველი ცხოვრობს.

ორგანიზაციის ექსპერტთა მონაცემებით, ე.წ. სამხრეთ ოსეთის სოფლის მეურნეობა ამჟამად სავალალო მდგომარეობაში იმყოფება. იმის გამო, რომ იქ სასოფლო-სამეურნეო მიწები სახელმწიფოს საკუთრებაში იმყოფება, ეს ხელს უშლის მათ ათვისებას. ხილის ექსპორტი რუსეთში მაღალი საბაჟო გადასახადის გამო არამომგებიანია. ადგილობრივ ფერმერებს ასევე არა აქვთ საშუალება ე.წ. სამხრეთ ოსეთში მდგარ რუს სამშვიდობოებს პროდუქტი მიაწოდონ, იმის გამო, რომ რუსეთის ფედერაციის თავდაცვის სამინისტრო მსხვილ მიმწოდებლებს ანიჭებს უპირატესობას.

ბიზნესის განვითარება ე.წ. სამხრეთ ოსეთში ასევე ნელა მიმდინარეობს. მეწარმეების შემოსავალი 500 დან 1000 აშშ დოლარამდეა თვეში. ერთადერთი სფერო _ რომელიც ე.წ. სამხრეთ ოსეთში მართლა ვითარდება _ რესტორნების ბიზნესია. აქ გამუდმებით იხსნება ახალი კერძო კაფეები რომლებიც იქ მყოფ რუს სამხედროებს და მშენებლებს ემსახურებიან.

ე.წ. სამხრეთ ოსეთის ყველაზე მსხვილი ე.წ. სახელმწიფო საწარმოებია _ მინერალური წყლის "ბაგიათის" მწარმოებელი ქარხანა და ქარხანა "ვიბრომაშინა". ეს ორივე საწარმო თავისი სიმძლავრის მხოლოდ მეხუთედი ნაწილით მუშაობს.

საერთაშორისო ორგანიზაციის ანგარიშში ასევე ნათქვამია, რომ კონფლიქტამდე ე.წ. სამხრეთ ოსეთის მრავალი მაცხოვრებელი საქართველოდან რუსეთში და პირიქით საქონლის არალეგალური ტრანსფერით ირჩენდა თავს. ამჟამად კი ე.წ. სამხრეთ ოსეთში არსებული პროდუქტების 90% რუსეთიდან შედის და მათზე ფასები ორჯერ უფრო მაღალია ვიდრე რუსეთის სამხრეთში.
ამავე დროს, ე.წ. სამხრეთ ოსეთში ხელფასების ზრდა შეინიშნება. მაგალითად, მასწავლებელი ახლა 2,5 ჯერ მეტ ხელფასს იღებს, ვიდრე ომამდე იღებდა. ე.წ. სამართალდამცავი ორგანოების თანამშრომელთა ხელფასები 250 დან 400 აშშ დოლარამდეა. ე.წ. სამხრეთ ოსეთში მიმდინარე აღდგენითი სამუშაოების გამო, აქ ახალი სამუშაო ადგილებიც გაჩნდა _ ძირითადად არაკვალიფიციური მუშახელისათვის.

ე.წ. სამხრეთ ოსეთში ფუნქციონირებს ორი "სახელმწიფო" ბანკი. მიმოქცევაში არსებული ვალუტა რუსული რუბლია. ე.წ. სამხრეთ ოსეთის ხელისუფლება არ აპირებს საკუთარ ფულის ერთეულზე გადასვლას. ე.წ. სამხრეთ ოსეთში არ მუშაობს ფოსტა. საზოგადოებრივი ინტერნეტი ხელმისაწვდომია მხოლოდ ერთ ინტერნეტ კაფეში. ე.წ. სამხრეთ ოსეთის სატრანსპორტო სისტემა არ ვითარდება.

საერთაშორისო ორგანიზაციის ანგარიშის მიხედვით ე.წ. სამხრეთ ოსეთის მოქალაქეები სამკურნალოდ ე.წ. რესპუბლიკის ფარგლებს გარეთ წასვლას ამჯობინებენ. ამავე დროს რუსეთის ტერიტორიაზე უფასო სამედიცინო დახმარების მიღება შეუძლიათ მხოლოდ მათ, ვისაც შიდა რუსული პასპორტი გააჩნიათ.

ასევე არ ვითარდება ე.წ. სამხრეთ ოსეთის განათლების სისტემა. წელს საშუალო სკოლის დამთავრების ატესტატი მხოლოდ 430 ბავშვმა მიიღო.

საერთაშორისო ორგანიზაციის ანგარიშის მიხედვით, ამჟამად ე.წ. სამხრეთ ოსეთში დაახლოებით 5 ათასამდე რუსი სამხედრო იმყოფება _ ეს დაახლოებით ე.წ. სამხრეთ ოსეთის მოსახლეობის 1/6 ნაწილია. ამავე დროს ე.წ. სამხრეთ ოსეთი ამცირებს საკუთარ ეწ. შეიარაღებულ ძალებს _ უახლოესი ორი წლის განმავლობაში ე.წ. სამხრეთ ოსეთის სამხედროთა რაოდენობა 3 ათასიდან _ 200 კაცამდე შემცირდება.

რუსული სამხედრო ბაზები იმყოფება: ცხინვალში, ჯავაში, ყანჩავეთში და ქურთაში. ამჟამად მიმდინარეობს კიდევ ერთი სამხედრო ბაზის მშენებლობა სოფელ სინაგურთან ახლოს.
ექსპერტები მიიჩნევენ, რომ ახალგორში განლაგებული რუსული სამხედრო ბაზა არის დასტური რუსეთის სამხედრო ინტერესების პრიორიტეტულობისა თავად ე.წ. სამხრეთ ოსეთის საჭიროებებზე. ეს ბაზა თბილისიდან 50 კილომეტრში იმყოფება და რუსეთისათვის დიდ სტრატეგიულ ფასეულობას წარმოადგენს.

რუსეთის ფედერაცია ასევე აპირებს დახარჯოს 35 მილიარდი რუსული რუბლი "ტრანსკამის" მშენებლობის განახლებისათვის და როკის გვირაბის აღდგენისათვის. ასევე გამოცხადებულია ტენდერი ჯავასა და ახალგორში აეროდრომების მშენებლობისათვის. ასევე განიხილება ახალი გზის მშენებლობის გეგმა, რომელიც ე.წ. სამხრეთ და ჩრდილოეთ ოსეთს მამისონის უღელტეხილის გავლით შეაერთებს.

საქართველოსა და ე.წ. სამხრეთ ოსეთის ადმინისტრაციულ საზღვარზე ოსი სამხედროების ნაცვლად 900 რუსი მესაზღვრე დგას.

"International Crisis Group"-ის ექსპერტები აცხადებენ, რომ რუსეთი გახდა მძევალი ჩავარდნისათვის განწირული გეოპოლიტიკური და ფსიქოლოგიური პროექტისა, თუმცა მათივე პროგნოზით მიუხედავად იმისა, რომ იქ რუსული ფული არაეფექტურად გამოიყენება, მოსკოვი ამ რეგიონის დაფინანსებას მაინც განაგრძობს. მათივე ანგარიშის მიხედვით, მოსკოვი ასევე შიშობს, რომ არასტაბილურობამ ე.წ. სამხრეთ ოსეთში შესაძლოა ჩრდილო კავკასიაში მღელვარებებს დაუდოს სათავე. კოკოითის ლოიალურობა ნებისმიერ დანახარჯს ანაზღაურებს და ამიტომაც რუსეთი არ ეცდება ე.წ. სამხრეთ ოსეთის ლიდერო 2011 წლამდე შეცვალოს.