საქართველოს პროკურატურამ ძეგვის თავშესაფარში მცხოვრებ უნარშეზღუდულ ადამიანებს საჩუქრად კომპიუტერები გადასცა. ძეგვის თავშესაფარში რამდენიმე უნარშეზღუდული მოზარდი ცხოვრობს და დღეიდან მათ საშუალება ექნებათ, ისარგებლონ ინტერნეტ მომსახურებით, მიიღონ მეტი ინფორმაცია, გამოიმუშავონ კომპიუტერთან მუშაობის უნარ-ჩვევები.
14 ივნისს მსოფლიო ინვალიდთა საერთაშორისო დღეს აღნიშნავს. პროკურორების სტუმრობაც ძეგვის თავშესაფარში დღეს, სწორედ ამ თარიღს უკავშირდება, თუმცა თავშესაფრის უნარშეზღუდულ ბინადართათვის პროკურორების ვიტიზები უცხო არ არის, მსგავსი საქველმოქმედო აქციები პროკურატურის თანამშრომლების მხრიდან უკვე ტრადიციად იქცა. როგორც ქალაქ მცხეთის პროკურორმა ნიკა დგებუაძემ აღნიშნა, პროკურატურა მზრუნველობამოკლებულ და უნარშეზღუდულ ადამიანებს არაერთხელ დაეხმარა და ეს ტრადიცია მომავალშიც გაგრძელდება.
საჩუქარი ძეგვის თავშესაფარს პროექტ "საზოგადოებრივი პროკურატურის" ფარგლებში გადაეცა. პროექტი საქართველოში 2006 წლიდან ხორციელდება და მისი მიზანია პროკურატურის ანგარიშვალდებულებისა და გამჭირვალობის გაზრდა, დანაშაულის პრევენციის მიმართულებით პროკურატურის ორგანოების მუშაობის ეფექტურობის უზრუნველყოფა, პროკურატურის მიერ საზოგადოების მოთხოვნების და პრობლემების გათვალისწინება, სამართალდამცავი ორგანოების მიმართ საზოგადოების ნდობის ამაღლება.
