დედაქალაქის მერი დავით ნარმანია მიიჩნევს, რომ ,,ბავშვთა სამყაროს“ ტერიტორიაზე გაჩენილი ხანძრის გამო პასუხისმგებლობა პირველ რიგში ბაზრობის ადმინისტრაციამ უნდა აიღოს. შემთხვევის ადგილზე მისული მერი ხანძრისგან დაზარალებულ მოვაჭრეებს გაესაუბრა და ხანძრის შედეგად დაზიანებული ტერიტორია დაათვალიერა.
მისი თქმით, ხანძრის მასშტაბი ძალიან დიდი იყო, თუმცა ამ ეტაპზე ლოკალიზებულია. მეხანძრეები ცალკეულ კერებზე მუშაობენ, რათა ხანძრის სრული ლიკვიდაცია მოხდეს.
„ზარალი არის ძალიან დიდი. ძალიან ბევრი ადამიანი მუშაობდა და მათი მხრიდან ისმის კითხვები, როგორ მოხდება ზარალის ანაზღაურება. დაზარალებულებისა და ჩვენი მხრიდან მთავარი აქცენტები კეთდება ბაზრობის ადმინისტრაციაზე. ბაზრობის ადმინისტრაციამ უნდა აიღოს პასუხისმგებლობა ამ ადამიანების წინაშე. ადმინისტრაცია, პირველ რიგში, პასუხისმგებელია გამოჩნდეს ამ ადამიანებთან, უთხრან მათ, რით შეუძლიათ დაეხმარონ. გამოძიებით უნდა დადგინდეს ხანძრის გამომწვევი მიზეზები. ძალიან ბევრ კითხვას, რომელიც ამ ადამიანების მხრიდან არსებობს, უნდა გაეცეს პასუხი“, - განაცხადა დავით ნარმანიამ.
