ვიცე-პოლკოვნიკი გია ცერცვაძე აცხადებს, რომ მისთვის წარმოუდგენელი იყო, თუ ქართული მხარე ინტერპოლით ძებნის შესახებ ინფორმაციას არ მიაწვდიდა.”რუსთავი 2”-თან ინტერვიუში მან ასევე განაცხადა, რომ მიუხედავად ამისა მაინც მიიღებს მონაწილეობას ყველა ბრძოლაში რუსეთის წინააღმდეგ.
”ჩემთვის დიდი შოკი იყო ის, რომ ასე მოხდა. მაგრამ თუ ბედისწერაა, რომ უნდა დაიღუპო, სჯობს, ეს ბრძოლის ველზე მოხდეს, ვიდრე ასე, ცხვარივით რომ დაგკლავენ. ეს იყო დასანანი.
რაც არ უნდა მოხდეს მე მაინც საქართველოს შეირაღებული ძალების ოფიცერი ვარ. მთავრობაში ხალხი მოდის-მიდის, საქართველო მაინც დარჩება. სანამ შემიძლია, სადაც არ უნდა იყოს, დღეს უკრაინა იქნება, თუ ხვალ აფრიკა, ყველგან ვიქნები, სადაც ბრძოლა იქნება რუსეთის წინააღმდეგ ”, -განაცხადა გია ცერცვაძემ.
რაც შეეხება მისი დაკავების მიზეზებს, ის აცხადებს, რომ რუსეთის ამოცანაა, მაქსიმალურად აიყვანოს ის პირები, ვისაც ჰქონდა და აქვს ინფორმაცია საქართველოს უსაფრთხოებაზე. მისივე თქმით, მეორე მოტივი ის არის, რომ ,,უნდათ ის ხალხი დასაჯონ, ვინც აქტიურად მონაწილეობდა რუსეთის წინააღმდეგ ბრძოლებში”.
გია ცერცვაძე, რომელიც აფხაზეთისა და 2008 წლის ომებში რუსეთის წინააღმდეგ იბრძოდა, 15 იანვარს უკრაინაში დააკავეს. მას რუსეთი 2003 წელს დანაშაულის ჩადენაში ედავება, თუმცა ცერცვაძეზე საერთაშორისო ძებნა მხოლოდ 13 წლის შემდეგ, 2016 წლის 23 დეკემბერს გამოცხადა. ის პატიმრობიდან გუშინ გათავისუფლდა, თუმცა ცერცვაძეზე საექსტრადიციო წარმოება გრძელდება. ძიების დასრულებამდე, რაც 40 დღიან ვადას მოიცავს.
