დღეს პარლამენტის უცხოეთში მცხოვრებ თანამემამულეთა კომიტეტისა და კავკასიელ ხალხებთან ურთიერთობის ჯგუფის სხდომაზე ჩრდილოეთ კავკასიელი ხალხის გენოციდის საკითხთან დაკავშირებით მეცნიერთა და ექსპერტთა დასკვნებს განიხილავდნენ. პროფესორებმა ბეჟან ხორავამ და მერაბ ჩუხუამ წარმოადგინეს არა მხოლოდ ქართველი და კავკასიელი, არამედ უცხოელი და თვით რუსი მეცნიერებისა და ექსპერტების მასალაზე დაყრდნობით შექმნილი დასკვნები, სადაც ბოლო ორი საუკუნის განმავლობაში რუსეთის სახელმწიფოს მიერ განხორციელებული სამხედრო ექსპედიციებისა და ეთნიკური წმენდის საზარელი მაგალითები და სტატისტიკა წარმოადგინეს.
"ფაქტები მეტყველებს, რომ ამ მოვლენებს ასეულობით ათასი ადამიანის სიცოცხლე შეეწირა. რა კვალიფიკაცია მიეცემას ამას, ეს დროსა და ბევრ მსჯელობას მოითხოვს", - განაცხადა დასკვნების მოსმენის შემდეგ პარლამენტის წევრმა გიორგი კანდელაკმა.
როგორც დღევანდელ სხდომაზე აღინიშნა, კომიტეტი დაელოდება სხვა მეცნიერთა დასკვნების გამოქვეყნებასაც, რომელთა დეტალურად განხილვის შემდეგაც შესაძლებელი იქნება კონკრეტული დასკვნის გაკეთება ამ მოვლენებთნ დაკავშირებით. ისინი მიმართავენ პარლამენტის ადამიანის უფლებათა დაცვისა და სამოქლაქო ინტეგრაციის, ასევე იურიდიულ საკითხთა კომიტეტებსაც, რომ ეს საკითხი მათაც განიხილონ, რათა იურიდიული კვალიფიკაციის საკითხი დადგეს.
"ეს დისკუსია გაგრძელდება და მნიშვნელოვანია, რომ ის არ იყოს ლოკალური არ შემოიფარგლოს მხოლოდ საქართველოთი და გახდეს მასშტაბური, მას უნდა მიეცეს საერთაშორისო ხასიათი. ამის წინაპირობა უკვე არსებობს და უახლოეს თვეებში ჩრდილოკავკასიური საკითხი იქნება უფრო აქტუალურიო მთელ მსოფლიოში, დისკუსიები გაგრძელდება", - განაცხადა უცხოეთში მცხოვრებ თნამემამულათა კომიტეტის თავმჯდომარემ, ნუგზარ წიკლაურმა.
