ბრიუსელში ნატო-საქართველოს კომისიის სხდომა დასრულდა. მედიისათვის სპეციალური ბრიფინგი სხდომის დასრულების შემდეგ ნატოს გენმდივანმა ანდრეს ფოგ რასმუსენმა გამართა.
ანდრეს ფოგ რასმუსენმა შემაჯამებელ პრესკონფერენციაზე თავისი გამოსვლა ნატო-საქართველოს კომისიის სხდომის განხილვითა და საქართველოში მიმდინარე რეფორმების დადებითი შეფასებით დაიწყო.
ამას გარდა, ნატოს გენმდივანმა, კონკრეტულად დაასახელა ის სფეროები სადაც რეფორმების გატარებაში ნატო საქართველოს დაეხმარება.
"ნატო-საქართველოს კომისიის ფარგლებში ჩვენ შევხვდით საქართველოს თავდაცვის მინისტრს. არ გაგიკვირდებათ ის, რომ მან მოისმინა მოკავშირეების ძლიერი მხარდამჭერი განცხადებები საქართველოს სუვერენიტეტისა და ტერიტორიული მთლიანობის მიმართ. მათ მადლობა გადაუხადეს საქართველოს ავღანეთში სამშვიდობო მისიაში მონაწილეობისათვის და კიდევ ერთხელ განაცხადეს, რომ ნატოს კარი საქართველოსათვის ღია რჩება, მაგრამ რეფორმების გაძლიერებაა საჭირო", _ განაცხადა რასმუსენმა და დასძინა, რომ საამისოდ ახლახანს ჩატარებული თვითმმართველობის არჩევნები იმედისმომცემი ნიშანია.
"ჩვენ განვაგრძობთ საქართველოს დახმარებას რეფორმების განხორციელებაში. ვფიქრობ, რომ აქცენტი უნდა იყოს გადატანილი თავდაცვისა და უსაფრთხოების სფეროს რეფორმირებებზე. ჩვენ ნატო-საქართველოს სხდომის ფარგლებში უფრო ვრცლად ვისაუბრეთ ამის შესახებ", _ განაცხადა რასმუსენმა.
მისივე თქმით, რაც შეეხება ლისაბონის სამიტს "ჩვენი მნიშვნელოვანი გზავნილი გაწევრიანების მსურველი ქვეყნებისთვის ის იქნება, რომ ნატოს კარი ღიაა მათთვის _ ეს არის ალიანსის მთავარი პრინციპი. ყველა ქვეყანა ინდივიდუალურად წყვეტს თავის მომავალს.
"მე-10 მუხლშიც საუბარია, რომ ნატოს შეუძლია ნებისმიერი ქვეყანა მიიწვიოს გასაწევრიანებლად და ჩვენ ამას ლისაბონის სამიტზეც გავიმეორებთ", _ განაცხადა რასმუსენმა შემაჯამებელ პრესკონფერენციაზე.
