"ქრისტიან-დემოკრატები" მიიჩნევენ, რომ გზით სარგებლობის გადასახადის დაწესება ხელისუფლებას "უხარისხოდ გაკეთებული გზების შესანახად სჭირდება" და "ამისათვის კიდევ ბევრი რამის მოფიქრება მოუწევს". ეს განცხადება "ქრისტიან-დემოკრატების" წარმომადგენელმა ლევან ვეფხვაძემ დღეს პარლამენტში გზით სარგებლობის საფასურის დაწესების საკითხის განხილვისას გააკეთა.
როგორც ვეფხვაძემ განაცხადა, ავტობანი არის იმდენად უხარისხოდ აშენებული, რომ ბევრ ადგილას უკვე ჩაშლილია. მაგალითად დასახელა სოფელ შავშებთან არსებული მონაკვეთი, რაც მისი აზრით, უკავშირდება მშენებლობების ნაჩქარევად შესრულებას, რათა "ვიღაცამ ფორმულა სამით გაიაროს და იტრაბახოს" და მიიჩნევს, რომ გზით სარგებლობის საფასურის შემოღება სწორედ ამ საკითხს უკავშირდება.
"ამ საფასურის გარდა კიდევ ბევრი რამის შემოღება მოგიწევთ. სწორედ იმიტომ, რომ ვითომდა გაკეთებული გზები უკვე მოშლილია. პრობლემა კი ის არის, რომ ჩვენს მოსახლოებას ამ გზების გასაკეთებლად აღებული კრედიტების გასტუმრება ხომ ისედაც უწევთ და ახლა, ცუდად გაკეთებულის დასაფრად ზედმეტი საფასურის გადახდასაც დააკისრებს", _ განაცხადა ვეფხვაძემ.
მის ამ განცხადებას მიხიელ მაჭავარიანი გამოეხმაურა. როგორც მან აღნიშნა, მისთვის გზების ხარისხის კრიტიკა მისაღებია, თუმცა ვერ არკვევს რა შუაშია ფორმულა სამი.
როგორც მაჭავარიანი აღნიშნავს, მთავრობა სამუშაოების დროულად და აღებული ვალდებულებების ფარგლებში დასრულებას უწევს ზედამხედველობას. გაფუჭებული მონაკვეთების აღსადგენად კი ბიუჯეტიდან არანაირი თანხა არ დაიხარჯება.
მაჭავარიანის განმარტებით, ავტობანის მშენებლობას ებრაული კომპანია "აშტრომი" ახორციელებს. შესაბამისად, გაფუჭებული მონაკვეთების რეაბილიტაციას სწორედ ეს კომპანია საკუთარი სახსრებით განახორციელებს.
რაც შეეხება გზად სარგებლობის საფასურს, მთავრობის მიერ ინიცირებული კანონპროექტის თანახმად, მისი გადახდა იმ სატვირთო მანქანებს მოუწევთ, რომლებიც საბაჟო კონტროლს დაქვემდებარებული ტვირთების გადაზიდვა გადმოზიდვებს ახორციელებენ. თუმცა მთავრობა აღნიშნული საფასურის დაწესებას მომავალში არასატვირთო ავტომობილებზეც აპირებს.
