საპარლამენტო უმრავლესობის წევრი ზვიად ძიძიგური მიიჩნევს, რომ მთავრობამ, ”გაზპრომთან” მოლაპარაკებებში მაქსიმუმი გააკეთა. მისი თქმით, მოლაპარაკებების შედეგად, არც მოსახლეობა, არც ბიზნესი და არც ქვეყნის ინტერესები არ დაზარალდება.
,,არც ერთი ოპონენტი, რომელიც აკრიტიკებს „გაზპრომთან“ დადებულ ხელშეკრულებას, არ აფიქსირებს რა უნდა გაეკეთებინა მთავრობას უფრო მეტი და არ გააკეთა. მაქსიმუმის მაქსიმუმი არის გაკეთებული. უფრო მეტის მიღწევა იყო შეუძლებელი. ამ ხელშეკრულებაში ძალიან კარგი პირობებია ჩადებული ქართული მხარისთვის. ის, რომ პოლიტიკური შოუს დადგმა უნდა ოპოზიციას, ცალკეულ პოლიტიკურ ფიგურებს, ამაში ახალი არაფერია არც ჩვენთვის და არც ქართული პოლიტიკური სივრცისთვის. ფასთან და იმასთან დაკავშირებით რაც კომერციული საიდუმლოებაა, მე, ამის გასაჯაროებას არ ვაპირებ. ძალიან კარგია და მომგებიანი პირობებით, ყველაფერი გაკეთებულია ქართული მხარისთვის. ჩვენ შევინარჩუნეთ ერთი მხრივ როგორც სატრანზიტო ფუნქცია, ასევე შევინარჩუნეთ ბუნებრივი აირის მოწოდება რუსეთის მხრიდან”, - განაცხადა ძიძიგურმა.
რაც შეეხება ”ნაციონალური მოძრაობის” რეზოლუციას ”გაზპრომთან” დაკავშირებით, როგორც ძიძიგური აღნიშნავს, ეს არის მცდელობა იმის, რათა დაადასტურონ რომ უფრო მაგარი ოპოზიციონერები არიან, ვიდრე დანარჩენის სხვა.
