რუსეთის საგარეო საქმეთა მინისტრმა სერგეი ლავროვმა "ყველა პრეტენზია რომელიც რუსეთსა და საქართველოს შორის ურთიერთობების ირგვლივ გამოითქმის" საქართველოს პრეზიდენტთან მიხეილ სააკაშვილთან გადაამისამართა და განაცხადა, რომ მან თავად "გათელა ფეხქვეშ საქართველოს ტერიტორიული მთლიანობა".
მისივე თქმით, საქართველოსთან კონფლიქტი რუსეთისათვის "ერთხელ და სამუდამოდ, საბოლოოდ არის გადაწყვეტილი".
"იგივე ეხება სხვა სერიოზულ ქვეყნებსაც, უბრალოდ, პოლიტკორექტულობისა და სხვა პოლიტიკური მიზეზების გამო ისინი ამას ოფიციალურად არ აღიარებენ", _ განაცხადა სერგეი ლავროვმა "კომერსანტთან" საუბრისას და დასძინა, რომ "მე არაერთხელ მითქვამს, რომ ეს ჩვენი არჩევანი არ ყოფილა და ყველა პრეტენზიით მიხეილ სააკაშვილს უნდა მიმართონ, რომელმაც თავისი ქმედებით, თავად გათელა ფეხქვეშ საქართველოს ტერიტორიული მთლიანობა და ამ საკითხზე ჯვარი დასვა", _ აცხადებს ლავროვი.
სერგეი ლავროვი ასევე აცხადებს, რომ 2008 წელს სარკოზისა და მედვედევის შეთანხმებას მოეწერა ხელი, რომელიც მხარეებს აფხაზეთისა და სამხრეთ ოსეთის სტატუსის განმსაზღვრელ საერთაშორისო დისკუსიების ჩატარებას გულისხმობდა.
"ეს დოკუმენტი შეთანხმებული იყო და საფრანგეთის პრეზიდენტმა ეს შეთანხმება თბილისში წაიღო, მერე კი დარეკა და განაცხადა, რომ სააკაშვილი კატეგორიულად წინაღმდეგია ამ რესპუბლიკების სტატუსის განხილვისა და რომ მისთვის სტატუსი გასაგებია და ეს ფრაზა უნდა ამოიღონ შეთანხმებიდან. ჩვენ დავთანხმდით", _ განაცხადა ლავროვმა.
