რუსეთის საგარეო საქმეთა მინისტრი სერგეი ლავროვი "კომერსანტისათვის" მიცემულ ინტერვიუში აცხადებს, რომ რუსეთმა პირნათლად შესრულა "მედვედევი-სარკოზის" გეგმა. მისი თქმით, რუსული ჯარი საქართველოს ტერიტორიაზე ამჟამად არ იმყოფება. ხოლო რაც შეეხება აფხაზეთსა და ე.წ. სამხრეთ ოსეთში მყოფ რუს სამხედროებს ისინი, ლავროვის თქმით, ამ რესპუბლიკებში სულ სხვა სამართლებრივ საფუძველზე არიან დისლოცირებულნი.
რუსეთის საგარეო საქმეთა მინისტრი ასევე აცხადებს, რომ რუსეთის ფედერაციის ჯარები, რომლებმაც "სამხრეთ ოსეთზე განხორციელებული თავდასხმა მოიგერიეს კვლავ რუსეთის ტერიტორიაზე გავიდნენ. ამ დროისათვის ჩაიშალა მოლაპარაკებები აფხაზეთისა და სამხრეთ ოსეთის სტატუსთან დაკავშირებით. პარალელურად თბილისიდან გაისმა განცხადებები იმის შესახებ, რომ ომი ჯერ დასრულებული არ არის. ამიტომაც აგვისტოს ბოლოს მიღებული იქნა გადაწყვეტილება აფხაზეთისა და სამხრეთ ოსეთის დამოუკიდებლობის აღიარების შესახებ, იმიტომ რომ ამ ხალხების უსაფრთხოების უზრუნველყოფის სხვა გზა არ არსებობდა".
"ხოლო რუსული კონტიგენტები ამჟამად აფხაზეთსა და სამხრეთ ოსეთში სხვა სამართლებრივ საფუძველზე იმყოფება _ ეს არის რუსეთსა და მის მიერ აღიარებული სახელმწიფოებს შორის გაფორმებული შეთანხმება ასე რომ "მედვედევის-სარკოზის" შეთანხმება რუსეთს შესრულებული აქვს", _ აცხადებს ლავროვი.
ხოლო მათ, კი ვინც აცხადებს, რომ რუსული ჯარი უნდა დაბრუნდეს 8 აგვისტომდე არსებულ პოზიციებზე, სერგეი ლავროვი შეახსენებს, რომ ნუ დაავიწყდებათ, რომ "2008 წლის 8 აგვისტომდე ჩვენი ჯარი საქართველოს ტერიტორიის სიღრმეში იდგა, ჩვენი სამშვიდობოები იყვნენ არა მხოლოდ სამხრეთ ოსეთში, რომელიც მაშინ საქართველოს ნაწილი იყო, არამედ მის ფარგლებს გარეთაც. იგივე იყო აფხაზეთშიც. ამიტომაც როდესაც ჩვენ მოგვიწოდებენ სამხრეთ ოსეთის ფარგლებს გარეთ დავდგეთ და ის უსაფრთხოების ხაზი დავიკავოთ სადაც ჩვენი სამშვიდობოები 8 აგვისტომდე იდგნენ, მე მადლობელი ვიქნებოდი ეს ჩვენთვის პირდაპირ რომ ეთქვათ", _ აცხადებს ლავროვი.
