ხელისუფლება მზად არის, წამლების ფასების მატების საკითხზე იმსჯელოს. ამის შესახებ განცხადება პარლამენტის პირველმა ვიცე-სპიკერმა მიხეილ მაჭავარიანმა დღეს სესიაზე "ქრისტიან-დემოკრატების~ საპასუხოდ მას შემდეგ გააკეთა, რაც მაგდა ანიკაშვილმა ფარმაცეპტულ სფეროში ფასების მკვეთრ ზრდასთან დაკავშირებით ხელისუფლებას გამოსავალის მოძებნისკენ მოუწოდა.
ანიკაშვილმა "დანაშაულებრივ ქმედებად~ შეაფასა მედიკამენტებზე ფასების მკვეთრი ზრდა, რადგან მისი თქმით, საქმე ადამიანების სიცოცხლეს ეხება.
ანიკაშვილი მიესალმა არასამთავრობო სექტორის მიერ ხმის ამაღლებას აღნიშნულ საკითხთან დაკავშირებით და აღნიშნა, რომ ჯანდაცვის სფერო არის ის სექტორი, რომელიც სახელმწიფომ თავის ნებაზე არ უნდა მიუშვას.
"ყოველთვის ხდება მანიპულირება ლარის კურსით. ხელისუფლებას უყვარს გამონათქვამი, ,,ბაზარი ყველაფერს დაარეგულირებსო~. მაგრამ ეს ჯანდაცვის სფეროს არ უნდა ეხებოდეს. უნდა მოიძებნოს ისეთი გამოსავალი, რომ არც ბიზნესი დაზარალდეს და არც ადამიანების სიცოცხლე დაიდოს სასწორზე. გათვალისწინებულ უნდა იქნას სპეციალისტების აზრი, რომ ფასების ასეთი ზრდის მიზეზები არ არსებობს,~ - განაცხადა ანიკაშვილმა.
დეპუტატს პარლამენტის ვიცე-სპიკერი მიხეილ მაჭავარინი გამოეხმაურა და აღნიშნა, რომ არიან ისეთი არასინდისიერი ადამიანები, რომლებიც წამლებზე ფასების მატებას ბიზნესს ეძახის. თუმცა, როგორც აღნიშნა, ამაზე მხოლოდ კონკრეტული ფაქტების წარდგენის შემდეგ იქნება საუბარი შესაძლებელი და `ქრისტიან-დემოკრატებს~ ურჩია, რომ საკითხი პარლამენტის ჯანდაცვის კომიტეტის თავმჯდომარესთან ოთარ თოიძესთან ერთად გაარკვიონ.
