ჩვენ გვაქვს ახლა შანსი, რომ საზოგადოებას რეალურად შევთავაზოთ ივანიშვილის ხელისუფლების ალტერნატივა, - განაცხადა „ნაციონალური მოძრაობიდან“ წამოსვლის შემდეგ ოთარ კახიძემ.
„ნაციონალური მოძრაობის“ მთავარი ძალა იყო ერთიანობაში. სამწუხაროდ, საპარლამენტო არჩევნების შემდგომ დავდექით სხვა რეალობის წინაშე, რომელიც დაიწყო ასე, რომ „მიხეილ სააკაშვილის გარეშე თქვენ ხართ ნულები“, - ეს ფრაზა იყო პირველი მერცხალი, შემდეგ მოჰყვა ცილისწამების და ტალახის სროლის ნიაღვარი. მე ასე არ ვთვლი, ნამდვილად. მე ვთვლი, რომ ჩვენი ძალა არის ერთობაში, კომპეტენციის ერთობაში, პატრიოტიზმის ერთობაში, საქმის კეთების ერთობაში და ჩვენ გვაქვს სწორედ შანსი ახლა, რომ „ვიღაცის გარეშე ნულებიდან“ გადავიდეთ და საზოგადოებას რეალურად შევთავაზოთ ივანიშვილის ხელისუფლების ალტერნატივა. რა თქმა უნდა, ჩვენ არ უნდა ავყვეთ და დავასრულოთ ეს შიდაპარტიული, აბსოლუტურად გაუგებარი დაპირისპირება. მე ბოლომდე მქონდა იმედი, რომ გიგი უგულავას და დავით ბაქრაძის მოწოდებებს მიხეილ სააკაშვილი გამოეხმაურებოდა და იქნებოდა მაკონსოლიდირებელი ფაქტორი. სამწუხაროდ, მას ეს უნარები, როგორც ლიდერს, უკვე აღარ აღმოაჩნდა, მაგრამ წარსულ დროებზე დარდი უნდა მოვიკლათ, ჩვენ უნდა ვსდიოთ სხვა ვარკვლავს ჩვენს საზოგადოებას, რომელიც ძალიან უკმაყოფილოა ჩვენი ამ მთავრობის უმოქმედობით, უნდა შევთავაზოთ ისეთი ალტერნატივა, რომელიც მისაღებია ფართო საზოგადოებისთვის“, - განაცხადა კახიძემ და დასძინა, რომ ახალი პოლიტიკური ძალა უნდა იყოს მიზიდულობის ცენტრი ყველა პროდასავლურად განწყობილი მოქალაქისთვის.
ე.წ. უგულავა-ბოკერიას ფრთის წარმომადგენლებმა ”ნაციონალური მოძრაობა” დატოვეს.
ისინი საქმიანობას ”ევროპულ საქართველოში” გააგრძელებენ. აღნიშნულ პარტიას კვალიფიციური სუბიექტის სტატუსი გააჩნია, ის დაფინანსებას სახელმწიფო ბიუჯეტიდან იღებს, ცესკოში ჰყავს საკუთარი წარმომადგენელი და კანონით განსაზღვრული ყველა იმ პრივილეგიით სარგებლობს, რაც ე.წ. კვალიფიციურ სუბიექტებს ეკუთვნის. პარტია “ევროპული საქართველოს“ დამფუძნებელი და ამჟამინდელი თავმჯდომარე ნუგზარ წერეთელია.
