ადგილობრივი თვითმმართველობის არჩევნებთან დაკავშირებით საქართველოს საერთო სასამართლოებში 32 სარჩელის განხილვა მოხდა, აქედან 4 შემთხვევაში სარჩელს მიღებაზე ეთქვა უარი, რადგან სარჩელი სასამართლოს არაუფლებამოსილი პირების მიერ ან კანონმდებლობით განსაზღვრული ვადისა და პროცედურების დარღვევით წარედგინა, ხოლო 1 სარჩელზე უარის თქმის გამო საქმის წარმოება შეწყდა.
განხილული 32 სარჩელიდან 3 შემთხვევაში სარჩელი სრულად დაკმაყოფილდა, 2 შემთხვევაში სარჩელი ნაწილობრივ დაკმაყოფილდა, 27 შემთხვევაში სარჩელი არ დაკმაყოფილდა იმის გამო, რომ საქმის სასამართლო სხდომაზე განხილვისას არ დადასტურდა სარჩელში მითითებული გარემოებები.
დაკმაყოფილებული სარჩელები "საქართველოს ახალგაზრდა იურისტთა ასოციაციის", "სამართლიანი არჩევნებისა და დემოკრატიის საერთაშორისო საზოგადოების", საარჩევნო ბლოკის "ალიანსი საქართველოსათვის" და საარჩევნო ბლოკი "გიორგი თარგამაძე, ინგა გრიგოლია _ ქრისტიან-დემოკრატიული გაერთიანების" მიერ იყო წარმოდგენილი, ასევე ოზურგეტის საოლქო საარჩევნო კომისიის მიერ.
აღნიშნული სარჩელების დაკმაყოფილების შედეგად 6 საარჩევნო უბნის შედეგები ბათილად იქნა ცნობილი. კერძოდ კი #70 ფოთის ოლქის #14 უბნის, #22 მარნეულის ოლქის #3, #26, #47, #67 უბნების, #79 ბათუმის ოლქის #3 უბნის, ხოლო #70 ფოთისა და #22 მარნეულის საოლქო საარჩევნო კომისიებს შესაბამისი უბნის შედეგების ხელახლა გადათვლა დაევალათ.
ასევე, ბათილად იქნა ცნობილი 31 საოლქო საარჩევნო კომისიაში სპეციალურ და სხვა საარჩევნო უბნებში მიმაგრებული შინაგან საქმეთა სამინისტროს მოსამსახურეებისათვის მაჟორიტარული წესით ხმის მისაცემი ბიულეტენების მიღება-ჩაბარების აქტები და შესაბამისად ზემოაღნიშნულ სპეციალურ და სხვა საარჩევნო უბნებზე მიმაგრებულ შ.ს.ს-ის მოსამსახურეებს არ მიეცათ მაჟორიტარული წესით ხმის მიცემის უფლება.
ამასთან, 1-ლი ინსტანციის სასამართლოების გადაწყვეტილებებზე შემოტანილ იქნა 10 სააპელაციო საჩივარი და 1 კერძო საჩივარი, საიდანაც 1 სააპელაციო საჩივარი (პოლიტიკური მოძრაობა "თავისუფლების") დაკმაყოფილდა ნაწილობრივ, ბათილად იქნა ცნობილი #65 მარტვილის ოლქის #3 და #35 საარჩევნო უბნის შედეგები და საარჩევნო კომისიას მითითებული საარჩევნო უბნების პროპორციული წესით ბიულეტენების ხელახლა დათვლა დაევალა.
