სააპელაციო სასამართლოში გიგი უგულავას საქმეზე, გუშინ გამართულ პროცესს, რომელიც თბილსერვის ჯგუფის ეპიზოდს ეხება, ,,ტაბულას“ გენერალური დირექტორი თამარ ჩერგოლეიშვილი ეხმიანება. მისი თქმით, გიგის გამოსვლასთან დაკავშირებული ისტერიკა, პროგნოზირებადი იყო.
,,გიგის გამოსვლასთან (როცა არ უნდა შედგეს) დაკავშირებული ისტერიკა, აბსურდული შინაარსის მიუხედავად, ძალიან, ძალიან იოლად პროგნოზირებადი იყო.
მრავალი წელია ამ კონვულსიებს ვაკვირდები. ის, რაც ფეისბუქზე ხდება, ამ კონვულსიების გამოვლინებაა.
მიშა გიგიზე ეჭვიანობს და თხვრის - დიდი ხანია ეჭვიანობს. ამჯერად უფრო ფართო აუდიტორიის წინაშე გააშიშვლა ეჭვები.
ესაა და ეს. ძალიან ბანალური ისტორიაა. სევდიანი და ბანალური”, - წერს facebook-ზე ჩერგოლეიშვილი.
სააპელაციო სასამართლო გიგი უგულავას საქმეზე, რომელიც თბილსერვის ჯგუფის ეპიზოდს ეხება, გადაწყვეტილების მისაღებად გავიდა. როგორც მოსამართლემ თქვა, მხარეებს განაჩენის გამოცხადების თარიღის შესახებ ეცნობებათ. პროცესზე სიტყვით გამოსვლისას დედაქალაქის ყოფილმა მერმა განაცხადა, რომ დასაქმება პარტიული ნიშნით მართლაც ხდებოდა.
"განზრახვა, რომ ეს ხალხი პარტიული ყოფილიყო, არ მქონია, მაგრამ იმასაც ვაცნობიერებ, რომ, სამწუხაროდ, ის, რაც მინდოდა, რომ კარგად გამოსულიყო, არ გამოვიდა. მე პატარა ბავშვი არ ვარ და არც პოლიტიკური გამოცდილების ნაკლებობა მაქვს. როცა ადამიანი, რომელსაც სახელმწიფო უხდის ხელფასს, მიდის მოქალაქესთან და როგორც პარტიული აქტივისტი ელაპარაკება, ცალსახად ცუდია. ძალიან ვწუხვარ, რომ ეს ცუდი პრაქტიკა მე ვერ ავლაგმე. მიზნად რომ დამესახა... რა მიზანიც დავისახე, ყველაფერი მეტნაკლებად შევასრულე. ეს ამბავი ასე არ იყო ჩაფიქრებული, მაგრამ ასე გამოვიდა. ცუდია ეს? რა თქმა უნდა, ცუდია.
შევთანხმდეთ ერთ რამეზე - სახელმწიფო ინსტიტუციით დასაქმებული ადამიანები თუ მუშაობენ როგორც მმართველი პარტიის აგიტატორები, ცალსახად ცუდია. მაგრამ მე ამას არ ვემიჯნები იმიტომ, რომ, სამწუხაროდ, ჩემი პრობლემაა, მაგრამ არც არავის სხვას არ ვაბრალებ”, - განაცხადა უგულავამ.
