"ნაციონალური მოძრაობის" ერთ-ერთი ლიდერი გიგა ბოკერია მიიჩნევს, რომ დღეს დიდ პრობლემას წარმოადგენს ენმ-ის ის ნაწილი, რომელიც მიხეილ სააკაშვილის ყველა სიტყვას აბსოლუტურ ჭეშმარიტებად მიიჩნევს, - ამის შესახებ გიგა ბოკერიამ ჟურნალისტებს განუცხადა.
როგორც გიგა ბოკერიამ აღნიშნა, მიხეილ სააკაშვილმა მონაწილეობა მიიღო ბინძურ კამპანიაში, რომელიც თითქოსდა ბიძინა ივანიშვილთან არსებულ გარიგებას უკავშირდება.
„პარლამენტში შესვლის საკითხთან დაკავშირებით დაიწყო ეს ძალიან ცუდი, ბინძური კამპანია. ეს ჯგუფი ნაბიჯ-ნაბიჯ ხლეჩს ამ პარტიას. ეს პირველ რიგში მდგომარეობს იმ ბინძურ კამპანიაში, ივანიშვილთან გარიგებასთან დაკავშირებით, რომელშიც სამწუხაროდ თვითონ მიხეილ სააკაშვილმა მიიღო მონაწილეობა. ეს კამპანია გაგრძელდება პარტიის ლეგიტიმური ორგანოების ბოიკოტირებით, ძალიან სამწუხარო რეალობაა“, - განაცხადა გიგა ბოკერიამ.
მისივე თქმით, დავით ბაქრაძეს ჰქონდა გულწრფელი მცდელობა, რომ ეს არანორმალური ვითარება შეეცვალა.
„მძიმეა ეს ვითარება, ჩვენ ვხვდებით ჩვენს რიგით წევრებს და გავაგრძელებთ ამ შეხვედრებს. ვიმსჯელებთ, რა შეიძლება, გავაკეთოთ ამ მძიმე ვითარებიდან გამოსვლისათვის, მაგრამ ვშიშობ, რომ ამ შემთხვევაში ჩვენს ხელში არ არის ეს გასაღები, გასაღები არის ერთი ადამიანის ხელში, ეს არის მიხეილ სააკაშვილი, მის დაქვემდებარებაში მყოფი ჯგუფი, რომელიც ამ სიბინძურეს, ამ ტალახს ისვრის და ასე სამარცხვინოდ იქცევა”, - განაცხადა გიგა ბოკერიამ.
დღეს "ნაციონალური მოძრაობის" პოლიტსაბჭოს სხდომა უნდა ჩატარებულიყო, თუმცა კვორუმის არასებობის გამო ჩაიშალა.
პოლიტსაბჭოს წევრების ნაწილმა, განცხადება დღეს დილით გაავრცელა და აღნიშნეს, რომ სხდომაზე დასწრება მიზანშეწონილად არ მიაჩნიათ.
