ტელეკომპანია „მაესტროს“ დამფუძნებელი მამუკა ღლონტი „მაესტროს“ ლოგოსთან დაკავშირებით სასამართლოს მიერ მიღებული გადაწყვეტილებას აფასებს და აცხადებს, რომ დღეს, კანონიერ მესაკუთრეს წაართვეს ინტელექტუალური საკუთრება. მისი თქმით, როდესაც პროცესები დაიწყო, მაშინვე განაცხადა, რომ საქართველოში ყველა საქმეს წააგებდნენ, თუმცა დიდი ალბათობით, ევროპულ სასამართლოებში ყველა პროცესს მოიგებენ.
,,მიმდინარეობს მედიის კონკრეტული პარტიული ინტერესების ქვეშ მოქცევა, ამას აკეთებს „ქართული ოცნება“. ძალიან მალე მოხდება ძალიან საინტერესო ამბები, კერძოდ, მედია სრულად გადავა "ქართული ოცნების“ ხელში. ამათი მოქმედების ვადები ასეთია, ახალი წელი ან აგვისტო, როცა საზოგადოების ყურადღება მოდუნებულია, თუმცა ადრე თუ გვიან, სამართლიანობა აუცილებლად აღდგება“, - განაცხადა მამუკა ღლონტმა.
თბილისის საქალაქო სასამართლომ ტელეკომპანია ,,მაესტროს“ ლოგო გია გაჩეჩილაძეს მიაკუთვნა. საქმე ეხება ლოგოს გამოყენების უფლების ირგვლივ დავას, რომლის დაბრუნებასაც ტელეკომპანიის ერთ-ერთი დამფუძნებელი ბაჩო კიკაბიძე მოითხოვდა.
დღეს მოსამართლემ 2014 წლის 24 ოქტომბრის პარტნიორთა კრების ის ხელშეკრულება სცნო ბათილად, რომლის საფუძველზეც სტუდია ,,მაესტროს“ 72% წილის მფლობელებმა ლოგო საკუთრებაში ბაჩო კიკაბიძეს გადასცეს. მოსამართლემ განაცხადა, რომ გენერალურ დირექტორს არ ჰქონდა უფლებამოსილება ოქმი გაეფორმებინა.
