ენმ-ის ყრილობა ისე უნდა დაიგეგმოს, რომ მან პოლიტიკურ გაერთიანებას ახალი იმპულსი მისცეს, - განაცხადა ჯურნალისტებთან პარტიაში მიმდინარე მოვლენებზე საუბრისას ენმ-ის დეპუტატმა სალომე სამადაშვილმა.
,,პარტიის მხარდამჭერებს შორის ძალიან დიდია ინტერესი ყრილობის მიმართ. შესაძლოა, ჩვენ ვიმსჯელოთ ყრილობის კონკრეტულ თარიღზე, მაგრამ ყველა შემთხვევაში საბოლოო გადაწყვეტილება ყველასათვის გასაგები და დასაბუთებული უნდა იყოს“, - აცხადებს სამადაშვილი.
მისივე თქმით, ეს ყრილობა ყველა შემთხვევაში „ნაციონალური მოძრაობის“ განვითარების ახალი ეტაპი იქნება. ამიტომ პარტიამ უნდა შეძლოს მაქსიმალურად გაითვალისწინოს ყველა მხარდამჭერი ჯგუფის ინტერესი და სურვილი.
ცნობისათვის, ენმ-ის ყრილობა 20 იანვრისთვის არის დაგეგმილი, თუმცა პარტიის ერთ-ერთმა ლიდერმა დავით ბაქრაძემ ყრილობის გადადების ინიციატივა გამოთქვა, რასაც უარყოფითი შეფასება მოჰყვა მიხეილ სააკაშვილისა და მისი მომხრეების მხრიდან.
