საქართველოს პარლამენტის თავმჯდომარე ირაკლი კობახიძის ინფორმაციით, ეკონომიკური გუნდის პარლამენტში მოსმენის საკითხი, ამ ეტაპზე დღის წესრიგში არ დადგება. ჟურნალისტებთან საუბარში მან კიდევ ერთხელ განმარტა, რომ ლარის კურსზე სავაჭრო პარტნიორების ვალუტების კურსის დევალვაცია მოქმედებს.
,,ეს არის ყველაზე სამწუხარო მოვლენა და მთავრობამ ყველაფერი უნდა გააკეთოს იმისთვის, რომ გარე ფაქტორების მიუხედავად, შეინარჩუნოს სტაბილური კურსი. ამას ემსახურება სწორედ ოთხპუნქტიანი გეგმა და ყველა ის სამთავრობო ინიციატივა, რომელიც გულისხმობს საქართველოში ეკონომიკური ზრდის ტემპების დაჩქარებას“, - განაცხადა ირაკლი კობახიძემ.
შესაბამისად, მთავრობის ეკონომიკური გუნდის პარლამენტში მოსმენის საკითხი, კობახიძის თქმით, მმართველი გუნდის მხრიდან ამ ეტაპზე დღის წესრიგში არ დადგება.
„ლარის კურსთან დაკავშირებით ჩვენ გვქონდა კითხვები, არაერთი მსჯელობა, დისკუსია სამთავრობო გუნდის წევრებთან. მოვისმინეთ მთავრობის მოსაზრება იმ მიზეზებთან დაკავშირებით, რომელიც განაპირობებს ლარის კურსის დევალვაციას. მთავრობის პოზიცია დამაჯერებელი იყო. შესაბამისად, ჩვენი მხრიდან დღეს ასეთი ინიციატივა არ დადგება, თუმცა, რა თქმა უნდა, ვაგრძელებთ მოვლენების დაკვირვებას და საჭიროების შემთხვევაში გვექნება დამატებითი კონსულტაციები სამთავრობო გუნდის წევრებთან“, - განაცხადა ირაკლი კობახიძემ.
