ოდესის ყოფილი გუბერნატორი მიხეილ სააკაშვილი ზუგდიდში, ენმ-ის მიერ გამართულ კონფერენციას უკრაინიდან სკაიპით ჩაერთო. მისი თქმით, ზოგმა თანაპარტიელმა ივანიშვილის წესებით თამაში აირჩია და მათ თანამებრძოლებს ვერ უწოდებს. ექსპრეზიდენტის განცხადებით, მან იცის რა გარიგებებიც შედგა, იმისათვის რომ პარტიიდან მისი ჩამოშორება მოხდეს.
„მე საკმარისად ვითმინე. ბევრი რამ ვიცი: ვიცი, რა გარიგებები შედგა, რა ლაპარაკი შედგა. ტყუილად ჰგონიათ, რომ მე ინფორმაცია არ მაქვს. მაქვს ინფორმაცია ორი, სამი, ხუთი და მეტი წყაროდან, საკმარისზე მეტი გამოცდილებაც მაქვს. ჩემი პასუხისმგებლობა არ არის ის, რომ ყველას ენა მოვუჩლიქო, ჩემი ამოცანა და პასუხისმგებლობაა, რომ გადაჯგუფება მოხდეს და პარტია გავაერთიანოთ ისე, რომ მან შეძლოს გამარჯვება.
დღესდღეობით იმ ხალხმა, ვიზეც მე ვსაუბრობდი, გამოგვიცხადეს, რომ ჩვენ ყოველთვის დავმარცხდებით. მე უარს ვამბობ დამარცხების ლოგიკის მიღებაზე, უარს ვამბობ ივანიშვილის თამაშის წესების მიღებაზე, ხოლო იმის გამოცხადება, რომ ჩვენ დავმარცხდებით, ივანიშვილის თამაშის წესების მიღებაა.“-ამბობს სააკაშვილი.
„პარტია უნდა გაემიჯნოს სააკაშვილს“ - ეს არის ივანიშვილის თამაშის წესები. რანაირად ებრძვით თქვენ ივანიშვილს, თუ მის წესებს იღებთ, რომ პარტია უნდა გაემიჯნოს სააკაშვილს? ეს არის ივანიშვილთან თქვენი ბრძოლა? ის, რომ უკრაინაში ამ ბოლო პერიოდში ოლიგარქების პრესამ აიტაცა - აი, საქართველოში თავისი პარტია გაემიჯნა სააკაშვილსო - ეს არის ივანიშვილთან თქვენებური ბრძოლა? მისი მთავარი პოლიტიკური მოწინააღმდეგის და მტრის გვერდზე გაწევა? მე ამას ვერ გავიზიარებ!“, - განაცხადა მიხეილ სააკაშვილმა.
მან ამომრჩეველთა შეურაცხყოფაზეც ისაუბრა:
"ჯოგი" ჩვენს თავზე არ მიგვიღია, პეროიანებმა თუ მიიღეს რაღაც თავის თავზე, ეს მათი პრობლემაა. კომფორმისტებს და იმ ხალხს, ვინც ყოველთვის თავის პირად კეთილდღეობას დააყენებს საერთო ინტერესებზე მაღლა, ნაციონალურ მოძრაობაში არაფერი ესაქმება. ნაციონალურ მოძრაობაში ყოველთვის იყო საუკეთესო ხალხი. ძვირფასო ლელა (ქებურია), ის ხალხი, ვისაც "პერიოიანები" სწყინთ, პარლამენტში მოიყვანა აი ამ ხალხმა, ვისაც ისინი ჯოგს ეძახიან. როდესაც მოგიყვანეთ პარლამენტში, უკაცრავად, ძვირფასო, მეორე დღესვე იმ ხალხის ფურთხება, ვინც მოგიყვანა, დარჩა სიცივეში, უხელფასობაში, უბედურებაში და საფრთხეში, მეორე დღესვე მათი შეურაცხყოფა ... ამ აქტივმა მოგიყვანათ თქვენ პარლამენტში თქვენ გაქვთ მათი ვალი.
ძალიან მარტივია, უნდა შექმნილიყო ქებურიას პარტია და რამდენ ხმასაც აიღებდა, იმდენი ხმით უნდა შესულიყავით. თუ გექნებოდათ 27 კაციანი ფრაქცია - გექნებოდათ 27 კაციანი ფრაქცია. ეს ხომ ლოგიკურად სწორია. რატომ არ შექმენით თქვენი პარტია, თუ ჩვენი გულისთვის არ მოდიოდით ჩვენთან? შეგექმნათ და თუ შეხვიდოდით პარლამენტში, მხარსაც აუცილებლად დაგიჭერდით. მაშინ ჩვენ ალბათ შევიყვანდით იმ ხალხს, ვინც ამ დარბაზში ზის და როცა თქვენ შეხვიდოდით თქვენი ფრაქციით, მერე ეს ხალხი მოვიდოდა თქვენთან და დაილაპარაკებდით - აი, ქალბატონო ლელა, თქვენ გაქვთ 27 ხმა, ჩვენ -საცოდავი 5 კინკილა ხმა, რამდენსაც მიიღებდა ნაციონალური მოძრაობა ქებურიას გარეშე და მოდი დავდგეთ და გავერთიანდეთ“, - განაცხადა სააკაშვილმა.
