საქართველოს პრეზიდენტის საპარლამენტო მდივანი ანა დოლიძე აცხადებს, რომ საკონსტიტუციო კომისიასთან დაკავშირებით კონსულტაციებისათვის მზაობა პრეზიდენტის ადმინისტრაციამ ჯერ კიდევ რამდენიმე თვის წინ, 19 ოქტომბერს გამოთქვა, კომისიაში არშესვლასთან დაკავშირებით კი, გადაწყვეტილება საქართველოს პრეზიდენტმა მიიღო.
ანა დოლიძის განცხადებით, დღეს საკონსტიტუციო კომისიასთან დაკავშირებული, გაწელილი საუბრები ქართულ რეალობასთან ზედმეტი და შეუსაბამოა.
„იმისათვის, რომ მართლები ვიყოთ უნდა ვისაუბროთ ფაქტებზე დაყრდნობით. ფაქტი არის ის, რომ 19 ოქტომბერს, პირველად საქართველოს პრეზიდენტის ადმინისტრაციამ დასვა საკითხი მზაობისა, რომ ემსჯელა პარლამენტთან და აღმასრულებელ ხელისუფლებასთან ერთად სამუშაო ჯგუფის შემადგენლობასა და საქმიანობის წესთან დაკაშირებით.
თუმცა შეგახსენებთ, რომ დღეს ქვეყნის წინაშე ბევრი სერიოზული, ძირითადად ეკონომიკური პრობლემაა. ხალხს აინტერესებს რას შეჭამს და რას ჩაიცვამს და როგორ გაათბობს სახლს ახალ წელს, შესაბამისად, ჩვენ მოვუწოდებთ უმაღლეს საკონანომდებლო ორგანოს და მთავრობას ჩვენთან ერთად ვკონცენტრირდეთ სწორედ ამ პრობლემების მოსაგვარებლად“, - განაცხადა ანა დოლიძემ.
