ფრაქცია ,,ქართული ოცნების“ თავმჯდომარე მამუკა მდინარაძის შეფასებით, 2017 წლის ბიუჯეტის ლეგიტიმურობასთან დაკავშირებით, არანაირი პრობლემა არ არასებობს. რომან გოცირიძის განცხადების კომენტირებისას მან ჟურნალისტებთან განმარტა, რომ ბიუჯეტი პარლამენტში ერთი მოსმენით მიიღება, ხოლო მისი თანმდევი კანონპროექტები სამი მოსმენით,.
,,კონკრეტული საკითხები მიმართულია ეკონომიკის გაჯანსაღებისკენ და არა შეფერხებისკენ. ვიმედოვნებთ, რომ თითოეული სვლა, რომელიც გაწერილია ბიუჯეტში მოხმარდება ეკონომიკის გაჯანსაღებას. სტერეოტიპული მიდგომებისგან უნდა გავთავისუფლდეთ. მათ შორის იურიდიულ სფეროში. ბიუჯეტი ერთი მოსმენით მიიღება, თანმდევი კანონპროექტი სამი მოსმენით. სწორი სამართალებრივი პრაქტიკა უნდა დაინერგოს, რომ ერთი მოსმენით გასატანი კანონპროექტი და სამი მოსმენით გასატანი კანონპროექტი მაინც და მაინც ერთად არ უნდა განიხილოს. გარდა ამისა, თანმდევი კანონპროექტები ამოქმედებას ბიუჯეტს არ დაასწრებენ, აქედან გამომდინარე, არანაირი სამართლებრივი პრობლემა აქ არ არის. მათი ამოქმედების ვადები ერთმანეთს არ უსწრებს. სამართლებრივ პრობლემაზე საუბარი არაკვალიფიციურია“, -განაცხადა მამუკა მდინარაძემ.
საპარლამენტო უმცირესობის წევრი რომან გოცირიძე, 2017 წლის ბიუჯეტს არალეგიტიმურს უწოდებს.
როგორც გოცირიძემ ჟურნალისტებთან საუბრისას აღნიშნა, პარლამენტს ჯერ საგადასახადო კოდექსში შესატანი ცვლილებები უნდა მიეღო, შემდგე კი მომავალი წლის მნიშვნელოვანი ფინანსური დოკუმენტი უნდა დაემტკიცებინა.