რუსეთის დუმის დეპუტატი, დსთ-ის ქვეყნების ინსტიტუტის დირექტორი კონსტანტინე ზატულინი აცხადებს, რომ უკრაინის პრეზიდენტმა აფხაზეთისა და სამხრეთ ოსეთის დამოუკიდებლობის აღიარებაზე უარი იმიტომ თქვა და ეს პრობლემა კოსოვოს საკითხთან იმიტომ გათანაბრა, რომ ყირიმში სეპარატიზმის ეშინია.
"ეს მოწმობს იმას, რომ უკრაინის დიპლომატიისთვის არ გამქრალა ეჭვები უკრაინის მთლიანობასთან დაკავშირებით. სწორედ ეს საფრთხე აიძულებს კიევს, დამატებითი სიფრთხილე გამოჩინოს", _ აცხადებს ზატულინი.
მისი აზრით, ასეთი პოზიცია იანუკოვიჩმა უკრაინის საგარეო საქმეთა მინისტრის რეკომენდაციით მიიღო, რომელიც, თავის მხრივ, ეყრდნობა იმ აზრს, რომ ამ ორი კავკასიური "რესპუბლიკის" აღიარება თავად უკრაინის ტერიტორიული მთლიანობისთვის იქნება საფრთხის შემცველი.
"უკრაინის საგარეო საქმეთა მინისტრმა კონსტანტინე გრიშჩენკომ, რომელიც ადრე იანუკოვიჩის მრჩეველი იყო საგარეო პოლიტიკურ საკითხებში, შეძლო იანუკოვიჩის დარწმუნება, რომ კიევმა არ უნდა იჩქაროს აფხაზეთისა და სამხრეთ ოსეთის დამოუკიდებლობის აღიარების საკითხში, იმიტომ რომ ამას თითქოს, შესაძლოა, შედეგები მოჰყვეს" _ აცხადებს ზატულინი.
მისი თქმით, კიევი არ ითვალისწინებს კოსოვოსა და ორი კავკასიური "რესპუბლიკის" აღიარების თავისებურებებს. "ანალოგი კოსოვოს, აფხაზეთსა და სამხრეთ ოსეთს შორის დასაშვებია. მთავარია, რომ ორ კავკასიური რესპუბლიკის დამოუკიდებლობა აღიარეს საქართველოს მიერ სამხრეთ ოსეთზე თავდასხმისა და აფხაზეთზე თავდასხმის მომზადების შემდეგ", _ აცხადებს ზატულინი.
მისი აზრით, არ შეიძლება ჩაითვალოს, რომ კიევის პოზიცია ამ საკითხთან მიმართებაში არ შეიცვლება. "ეს მათი გადაწყვეტილებაა და შესაძლოა რამდენიმე ხნის შემდეგ ისინი სხვა დასკვნამდე მივიდნენ", _ განაცხადა ზატულინმა.
