ესტონეთში 2008 წლის აგვისტოს მოვლენებისადმი მიძღვნილი წიგნი გამოვიდა. კრებული "ნოვაია გაზეტას" მასალების მიხედვითაა შედგენილი. ოსური მედია აღნიშნული წიგნის შესახებ, წერს, რომ "წიგნი საკმაოდ თავისებურ ჭრილშია გაშუქებული და მასში ერთმნიშვნელოვანი შეფასება არაფერს მიცემული არ აქვს".
წიგნის სახელწოდებაა "რუსეთ-საქართველოს ომი". წიგნი გამოსულია 1000-იანი ტირაჟით. "ნოვაია გაზეტას" მთავარი რედაქტორის სერგეი კოჟეუროვის ინფორმაციით, წიგნი მხოლოდ ესტონურ ენაზეა გამოცემული.
მისივე თქმით, "ნოვაია გაზეტა" არ არის დაკავებული პროპაგანდით, წიგნში არ არის მოვლენების ერთმნიშვნელოვანი შეფასება, "იმიტომ რომ ასეთ ომებში გამარჯვებული არ არსებობს. არც საქართველოს და არც რუსეთს ამ ომში არაფერი მოუგიათ. ამგვარ კონფლიქტებში ერთმნიშვნელოვნად ვერ იტყვი ვინ არის მართალი და ვინ მტყუანი", _ აცხადებს "ნოვაია გაზეტას" რედაქტორის მოადგილე და დასძენს, რომ მისი აზრით, ამ ომში ყველა დამნაშავეა _ "ერთნი იმაში, რომ თავის მიზნების განხორციელებას ცდილობდნენ და ამით კონფლიქტის პროვოცირება მოახდინეს, მეორენი იმაში, რომ მხარი დაუჭირეს ამ პროვოკაციებს და მესამენი იმაში, რომ წამოეგნენ ამ პროვოკაციებს და მძიმე შეიარაღება გამოიყენეს".
წიგნის წინასიტყვაობა მარტ ლაარის _ ესტონეთის ყოფილი პრემიერ-მინისტრის დაწერილია, რომელიც ბოლო წლების განმავლობაში საქართველოს პრეზიდენტის მიხეილ სააკაშვილის მრჩეველი იყო. ლაარი ასევე ცნობილია თავისი რადიკალიზმითა და რუსეთისადმი თავისი მკვეთრი განცხადებებით.
ოსური მხარე წერს, რომ სწორედ ლაარი იყო ერთ ერთი მათგანი, ვინც სააკაშვილს ე.წ. სამხრეთ ოსეთში ომის დაწყება ურჩია. "სააკაშვილს სხვა არაფერი რჩებოდა სამხედრო ოპერაციის ჩატარების გარდა", _ აცხადებდა ლაარი საქართველოდან დაბრუნების შემდეგ.
აღსანიშნავია, რომ რუსეთ-საქართველოს შორის აგვისტოში მომხდარ ომზე რუსეთში რამდენიმე წიგნი უკვე გამოიცა. მათგან ყველაზე შთამბეჭდავია რუსეთის გენერალურ პროკურატურასთან არსებული საგამოძიებო კომიტეტის ხელმძღვანელის ალექსანდრე ბასტირკინის წიგნი სათაურით "ოსური ტრაგედია".
