ტექდათვალიერება, გაუმჯობესებული სტანდარტები ავტოსატრანსპორტო საშუალებებზე, უნდა იყოს მინიმალურად მტკივნეული მოსახლეობისთვის, -მ ამის შესახებ საქართველოს პრემიერ-მინისტრობის მოვალეობის შემსრულებელმა გიორგი კვირიკაშვილმა პარლამენტში ფრაქცია “პატრიოტთა ალიანსის“ წევრებთან შეხვედრაზე განაცხადა.
„ჩვენ ვგეგმავთ გარკვეული ზომების გატარებას, ეს იქნება, რა თქმა უნდა, ტექდათვალიერება, გაუმჯობესებული სტანდარტები ავტოსატრანსპორტო საშუალებებზე, თანდათანობითი დანერგვა, რათა ეს იყოს მინიმალურად მტკივნეული მოსახლეობისთვის. დამეთანხმებით, რომ იმ პრაქტიკით, რომელიც მიღებულია ევროპის ქვეყნებში, ამის განხორციელება აუცილებელია, რათა ცხოვრების ხარისხი ჩვენს ქვეყანაში გავაუმჯობესოთ”, - აღნიშნა გიორგი კვირიკაშვილმა.
მისივე თქმით, მომდევნო ოთხის წლის განმავლობაში ქვეყანას მართებს კიდევ უფრო მეტად გააქტიურება ინფრასტრუქტურის მოდერნიზაციის მიმართულებით.
„როდესაც საუბარია სივრცითი მოწყობაზე, ის გულისხმობს მოწესრიგებულ განვითარებას იმ ლოკაციების, რომლებიც არის ჩვენთვის მნიშვნელოვანი, ტურისტული მიმართულებები, რათა არ მოხდეს სტიქიური განვითარება და მოხდეს კანონზომიერი, დაგეგმილი, გენერალური გეგმების მიხედვით განვითარება. რა თქმა უნდა, ეს გულისხმობს გარკვეულ რეგულაციებს სართულიანობაზე, გარემოპირკეთებაზე, განლაგებაზე, საჯარო სივრცეების მოწყობაზე, მაგრამ ეს იქნება სწორედ იმისათვის, რომ დამატებითი ღირებულება შეიქმნას უძრავი ქონების მიმართულებით. საქართველო გახდეს მიმზიდველი არა თავისი სტიქიური განვითარებით, არამედ იმით, რაც გეგმიურ, მდგრად განვითარებას გულისხმობს, რომელიც გულისხმობს მწვანე სივრცეების, დასასვენებელი ზონებისა და ადამიანებისთვის უკეთესი საცხოვრებელი გარემოს შექმნას”, - განაცხადა გიორგი კვირიკაშვილმა.
