ესპანეთის ქალაქ კორდობაში მცხოვრები ქართველი მხატვარი დავით ჭაბუკაშვილი ადგილობრივ პოლიციას მისი ნამუშევრების დატაცებაში ადანაშაულებს და დახმარებას ქართულ მედიას და საქართველოს ხელისუფლებას თხოვს.
როგორც "ჯი-ეიჩ-ენს" მხატვარმა აცნობა, იგი კორდობაში 2009 წლის ივლისიდან იმყოფება.
"პირველივე გამოფენამ, რომელიც მე ღია ცის ქვეშ გავმართე, ენით აუწერელი წარმატება მომიტანა. ხალხი საოცარ ემოციებს გამოხატავდნენ. ნელ-ნელა ქალაქმა გამიცნო. ხალხი პატივისცემით მეპყრობოდნენ. ვუხსნიდი საქართველოს, როგორც დიდი ისტორიის მქონე ყველაზე უძველეს ქვეყანას ევროპაში", - აცხადებს მხატვარი.
მისი თქმით, ამა წლის 31 მაისს, გამოფენის დროს, მასთამ მივიდნენ ე. წ. "პოლიცია ლოკალის", წარმომადგენლები და ლიცენზია მოსთხოვეს.
"მე იგი არ მქონდა, რადგანაც სამჯერ ვცადე მიღება და სამჯერვე, რამდენიმე თვე ველოდე, რომ თითქოს სახლში მივიღებდით ფაქტურის ფურცელს, თუმცა უშედეგოდ", _ აცხადებს დავით ჭაბუკაშვილი და დასძენს, "მათ აკრიფეს ჩემი ნახატები და შეჰყარეს მანქანაში, არა როგორც ფერწერული ტილოები, არამედ როგორც ვადაგასული საქონელი. ჩემს პროტესტზე მათგან მივიღე პასუხი, რომ მეორე დღეს მივიტანდი მათთან გადახდილი ჯარიმის ქვითარს და გამომატანდნენ ნამუშევრებს. მათ არ მომცეს არავითარი ოქმი, თუ რა წაიღეს და სად მიჰქონდათ. ამით მათ უხეშად დარღვიეს კანონი და როგორც ჩანს თავიდანვე გულში ედოთ სურათების გატაცება".
დავით ჭაბუკაშვილის განმარტებით, მეორე დღეს მას პოლიციაში აუხსნეს, რომ უნდა გადაეხადა ჯარიმა 55.10 ევრო და წარედგინა ჯარიმის გადახდის საბუთი, რის შემდეგაც დაუყოვნებლივ გაატანდნენ ნამუშევრებს.
"ჯარიმის ქვითრის წარდგენის შემდეგ, პოლიციაში მითხრეს, რომ ნახატებს დამიბრუნებდნენ, მაგრამ იმ განყოფილებაში, სადაც ნახატები უნდა ინახებოდეს, გაურკვეველი პასუხით მისტუმრებენ, რის გამოც მაქვს ეჭვი, რომ ნახატები პოლიციელებმა დაიტაცეს", - აცხადებს დავით ჭაბუკაშვილი.
დავით ჭაბუკაშვილი აღნიშნავს, რომ მან აღნიშნულზე საქმის კურსში ჩააყენა საქართველოს საკონსულო მადრიდში, "მათაც იგივე ძუნწი პასუხი მიიღეს".
"მიმაჩნია, რომ ეს არის ესპანეთის პოლიციელების მხრიდან მხატვრის პირადი საკუთრების ძარცვა. გული მწყდება როდესაც ქართველებს ცუდ საქმეებს აბრალებენ ევროპაში, მაგრამ ახლა მე ვდებ ბრალს მათ ადამიანის უფლებების დარღვევაში და ძარცვაში", - აღნიშნავს ქართველი მხატვარი.
დავით ჭაბუკაშვილი თხოვნით მივმართავს ქართულ მედიას სათანადოდ გააშუქონ მომხდარი ფაქტი.
"თხოვნით მივმართავ საქართველოს ტელეკომპანიებს და პრესას, რომ გააშუქონ ეს ფაქტი. ველოდები მხარდაჭერას, ველოდები საქართველოს ხმას", _ აღნიშნავს დავით ჭაბუკაშვილი.
